Ibi Bruno Ferry yabigarutseho mu kiganiro n’intangazamakuru, nyuma y’umukino ubanza wa ¼ w’igikombe cy’Amahoro Rayon Sports yanganyijemo na Police FC 0-0.

Bruno Ferry yatangaje ko abakinnyi be bagaragaje ubutwari bukomeye muri uyu mukino ndetse yishimiye ubunyamwuga bagaragaje mu kibuga muri uyu mukino utari woroshye.

Yagize ati “ Abakinnyi bacu uyu munsi bagaragaje ubutwari bukomeye cyane. Twakinnye umukino mwiza cyane, ntekereza ko twawukinnye dufite n’icyizere. Twanakinnye dufite imbaraga n’imyitwarire igaragaza ubunyamwuga, ku buryo byari bishimishije cyane kubibona.”

Muri uyu mukino ikipe ya Rayon Sports yavunikishije abakinnyi batatu barimo Mugisha Didier, Emery Bayisenge ndetse na Bigirimana Abedi. Aba baje basanga abarimo Tshimanga Chilembi, Aziz Ben Dao, Yannick Bangala ndetse na Vigninou Joachim, bivumbuye banga gukina kubera umushahara bishyuza. 

Bruno Ferry yagaragaje gushimira abakinnyi bitabajwe muri uyu mukino mu buryo butunguranye kubera ibi bibazo byose bahuye nabyo ndetse bakitwara neza.

Yagize ati “ Twari twongeye gukina n’ikipe nziza ya Police FC. Abahungu bacu bitwaye neza kandi bagaragaje ko bahari, nubwo ibihe bitari byoroshye cyane. Ibi birerekana ko muri iri tsinda dufite abakinnyi dushobora kwizera, kandi igihe tubahamagaye baritaba bagatanga umusaruro. Ibyo biradushimisha cyane.”

Biragoye ko imvune aba bakinnyi bagize bazakina umukino Rayon Sports igiye gukomeza kwitegura wa Al Merrikh SC ariko Bruno Ferry abona ibi byabaye ari ibintu bisanzwe bibaho mu mupira w’Amaguru, ahubwo bagiye kugerageza kwisanisha n’ibi bihe barimo kugira ngo bitware neza.

Yagize ati “ Tuzareba niba abakinnyi bose bazaba bahari, nubwo bishobora kutaba byoroshye, ariko ntabwo byatuma twitotomba kuko ibi ni ubuzima busanzwe bw’ikipe. Si kenshi usanga abakinnyi bose bahari icyarimwe. Njye nk’umutoza ngerageza kwihuza n’ibi bihe nkora uko nshoboye.”

Yakomeje agira ati “ Nk’uko nabivuze, tuzareba niba ku wa mbere abakinnyi bose bazaba bahari. Tuzanareba niba hari abatarakinnye uyu munsi bashobora kugaruka. Hanyuma tuzahitamo abazakora mu itsinda rizajya ku mukino ndetse n’abazabanza mu kibuga.”

Nyuma yo kunganya, ikipe ya Rayon Sports ifite akazi gakomeye izakorera mu rugo yakiriye ikipe ya Police FC igashaka ibitego ariko ikirinda kwinjizwa kuko byatuma isezererwa mu gihe baba banganyije cyangwa itsinzwe.

Iyi kipe igiye gukomeza kwitegura umukino ifitanye na Al Merrikh SC uzaba tariki 16 Werurwe 2026. Umukino ubanza wahuje aya makipe yombi warangiye ikipe zombi zinganyije ibitego 2-2.