Iyi nama ya Multaqaa ni imwe mu nama zikomeye zihuza abayobozi b’umuryango w’Abayislamu mu Rwanda, igamije gusuzuma imikorere y’umuryango, kongerera imbaraga ubumwe n’imikoranire, ndetse no gutegura gahunda zigamije iterambere ry’Abayislamu n’umusanzu wabo mu kubaka idini ya Islam n'igihugu muri rusange.

Iyi nama ahanini iba igamije kurebera hamwe uko umuryango w'abayisilamu mu Rwanda uhagaze muri rusange, gusuzuma ibikorwa byakozwe mu gihe cyashize, ndetse no gutegura gahunda n’ingamba zizashyirwa mu bikorwa mu gihe kiri imbere hagamijwe guteza imbere umuryango n’abawugize.

Mufti Sheikh Sindayigaya, yagaragaje ko Multaqaa ari umwanya w’ingenzi utuma abayobozi baganira ku bibazo n’ibyiza byagezweho, bakungurana ibitekerezo ku cyakorwa kugira ngo umuryango ukomeze gutera imbere mu nzego zitandukanye zirimo uburezi, imibereho myiza n’ubufatanye mu kubaka igihugu.

Yagize ati " Umuryango w’Abayislamu mu Rwanda ukomeje gutera imbere bitewe n’imiyoborere myiza iri mu gihugu cyacu, ashimangira ko ubuyobozi bwiza butuma amadini n’amatorero akorera mu bwisanzure kandi agatanga umusanzu mu iterambere ry’igihugu."

Yanashimiye by’umwihariko imiyoborere myiza ya Nyakubahwa Perezida wa Repubulika y’u Rwanda, Paul Kagame, avuga ko ubuyobozi bwe bwagize uruhare rukomeye mu gushyigikira iterambere ry’imiryango ishingiye ku myemerere, harimo n’Umuryango w’Abayislamu mu Rwanda.

Yavuze ko inkunga n’ubufatanye igihugu giha umuryango w’Abayislamu mu rwego rwo kwiyubaka by’umwihariko mu bijyanye n’ububanyi n’amahanga bituma umuryango urushaho gukomera, ukabona amahirwe yo gukorana n’indi miryango mpuzamahanga ndetse no guteza imbere ibikorwa by’iterambere.

Mufti Sheikh Sindayigaya Mussa yagize ati:
"Iyi nama ya Multaqaa idufasha gusuzuma aho tugeze nk’Umuryango w’Abayislamu mu Rwanda, tukaganira ku byagezweho ndetse tugashyiraho ingamba zizatuma turushaho gutanga umusanzu mu iterambere ry’igihugu no mu mibereho myiza y’abaturage."

Yakomeje agaragaza ko iyi mikoranire itanga icyizere cy’ejo hazaza heza ku muryango w’Abayislamu mu Rwanda, kuko ifasha mu kongera ubushobozi, guteza imbere uburezi bw’idini, ibikorwa by’urukundo n’ubufatanye mu muryango nyarwanda.

Mufti yashimiye by’umwihariko imiyoborere myiza ya Nyakubahwa Perezida wa Repubulika y’u Rwanda, Paul Kagame, avuga ko ubuyobozi bwe bwagize uruhare rukomeye mu gushyigikira iterambere ry’imiryango ishingiye ku myemerere, harimo n’Umuryango w’Abayislamu mu Rwanda.

Ati "Turashimira ubuyobozi bw’igihugu cyacu buduha amahirwe yo gukora mu bwisanzure, tugashyigikirwa mu bikorwa by’iterambere ndetse n’ububanyi n’amahanga bufasha umuryango wacu gukorana n’abandi ku rwego mpuzamahanga."

Abitabiriye iyi nama baganiriye ku ngingo zitandukanye zirimo guteza imbere ubumwe bw’Abayislamu, kongera uruhare rwabo mu bikorwa by’iterambere ry’igihugu, ndetse no gushimangira indangagaciro z’amahoro, ubworoherane n’ubwubahane hagati y’amadini n’abanyarwanda muri rusange.

Abashoramari b’Abayislamu bitabiriye iyi nama bagaragaje ko ubufatanye hagati y’umuryango n’abikorera ku giti cyabo ari ingenzi mu guteza imbere ubukungu bw’umuryango.

Umwe mu bashoramari witabiriye inama yabwiye ukwelitimes ko Abayisilamu bafite ubushake bwo kubaka idini ryabo no gukorera igihugu cyabo

Yagize ati "Abayislamu bafite amahirwe menshi mu bucuruzi no mu mishinga y’iterambere. Iyo twishyize hamwe, dushobora gushyiraho imishinga ikomeye itanga akazi kandi igafasha umuryango wacu gutera imbere."

Iyi nama yasojwe no gusangira ifunguro rya iftar ndetse no gufata amafoto y'urwibutso kubari bitabiriye iyi nama.