Slot yari yaranditse amateka muri Liverpool nyuma yo kuyihesha igikombe cya Shampiyona y’u Bwongereza, abikoze mu mwaka we wa mbere atoza iyi kipe, asimbuye Jürgen Klopp wari wasezeye.

Nubwo yari yatangiye neza, igice cy’imikino yo kwishyura cya Saison 2025-2026 cyabaye kibi cyane kuri Liverpool FC. N’ubwo iyi kipe yari yarakoresheje amafaranga agera kuri miliyoni 450 z’amapawundi mu kugura abakinnyi bakomeye barimo Alexander Isak, Florian Wirtz, Hugo Ekitike, Jeremie Frimpong na Milos Kerkez, umusaruro ntiwabaye mwiza.

Liverpool yarangije shampiyona iri ku mwanya wa gatanu, ibona itike ya UEFA Champions League ku munsi wa nyuma wa shampiyona.

Yasoje ifite amanota 60 gusa, irusha AFC Bournemouth ya Andoni Iraola amanota atatu.

Nyuma y’ibi bibazo, Liverpool yahise ihitamo Iraola wari umaze imyaka itatu yitwara neza muri Bournemouth. Uyu mutoza yasinyiye Liverpool amasezerano y’imyaka ibiri.

Mu magambo ye ya mbere, Iraola yavuze ko yishimiye cyane kugera muri Liverpool. Yagize  ati “Ndishimye cyane. Liverpool ni ikipe ikomeye cyane, imwe mu zikomeye ku isi. Ariko uko nagiye ndushaho kuyimenya, nasanze ari ikipe yihariye. Izina rya Liverpool ubwaryo ririhagije kugira ngo rikurure umuntu. Abafana, ikirere cyo ku kibuga, abakinnyi n’amahirwe yo guhatanira ibikombe, byose bituma iyi kipe iba ahantu heza cyane ku mutoza.”

Iraola asize amateka akomeye muri Bournemouth. Yabaye umutoza wa mbere wayigejeje mu marushanwa y’i Burayi nyuma y’imyaka 127 iyi kipe imaze ibayeho. Yayitoje kuva mu 2023, ayigeza ku mwanya wa 12 muri Premier League mu 2023-24, uwa 9 muri Saison ya 2024-2025 ndetse aza kuyinjiza mu makipe atandatu ya mbere mu 2025-2026.

Muri buri mwaka, Bournemouth yagiye ishyiraho agahigo kayo k’amanota menshi muri Premier League, aho mu mwaka wa 2023-2024 yagize amanota 48, mu mwaka wa 2024-2025 yagize amanota 56 ndetse mu mwaka wa 2025-2026 yagize amanota 57.

Iraola aje muri Liverpool mu gihe iyi kipe iri mu mpinduka zikomeye nyuma yo gutandukana n’ibihangange byayo birimo Mohamed Salah na Andy Robertson. Myugariro wo hagati Ibrahima Konate na we yamaze gutangaza ko azava muri iyi kipe.

Mbere y’uko Iraola ahabwa aka kazi, izina rya Xabi Alonso ni ryo ryavugwaga cyane nk’ushobora gusimbura Slot, ariko yikuye muri ayo mahitamo nyuma yo kwemera gutoza Chelsea FC guhera muri Nyakanga.

Andoni Iraola abaye umutoza wa 23 utoje Liverpool ku buryo buhoraho, ndetse ni uwa kabiri ukomoka muri Espagne nyuma ya Rafael Benítez, wayihesheje igikombe cya UEFA Champions League 2005 ndetse n’icya FA Cup 2006.