Ni ibyatangajwe ku mugoroba wo ku wa Kane tariki ya 4 Kamena 2026 nyuma y’imyigaragambyo uyu Omoyele Sowore yayoboye mu mujyi wa Abuja yari igamije kwivumbura kuri Leta ya Nigeria no kwereka abaturage ko Perezida uyoboye igihugu akorana n’umutwe wa Boko Haram.

Mu rubanza Omoyele Sowore ategetswe kwitaba bitarenze tariki ya 7 Kamena uyu mwaka, usanzwe umwunganira mu mategeko Marshall Abubakar yasabye Urukiko Rukuru rwa Leta i Abuja kwitondera kuburanisha urwo rubanza avuga ko rwaba rugiye kwicira umukiriya we izina rukanamwangisha abaturage kandi ari mu myiteguro yo kwitabira amatora ateganyijwe kuba umwaka utaha.

Ubushinjacyaha bwamaganye ubwo busabe, buvuga ko ibyo bigamije kwikuraho ibyo bagomba kubazwa, bituma Umucamanza Mohammed Umar ukuriye Urukiko Rukuru rwa Leta i Abuja ategeka ko Omoyele Sowore agomba kwitaba urukiko akisobanura ku byo aregwa byo gusebya Perezida Bola Tinubu bitarenze icyo gihe yahawe.

Omoyele Sowore akurikiranywe n’Urwego rw’Ubutasi rwa Nigeria DSS, rumushinja gusebya Perezida Bola Tinubu mu ruhame imbere y’imbaga y’abaturage amwita Boko Haram, no gutangaza amagambo amusebya yanyujije ku mbuga nkoranyambaga ze zirimo X na Facebook.