Ibi bihano byatangajwe ku wa Kane tariki ya 5 Kamena 2026 n’Urwego rwa Amerika rushinzwe kugenzura umutungo n'ibihano bya Leta (Treasury Department), bikaba byibasiriye Díaz-Canel, umugore we Lis Cuesta Peraza, umuhungu wabo Manuel Anido Cuesta ndetse n'abandi bayobozi b'inzego za Leta ya Cuba.

Ni ibihano byanafatiwe umwana n'umwuzukuru wa Raúl Castro, wahoze ayobora Cuba ndetse na bo bari mu bashyizwe ku rutonde rw'abafatiwe ibihano.

Guverinoma ya Donald Trump ivuga ko ibi bihano bigamije gukaza ingamba zo guhatira ubutegetsi bwa Cuba kubahiriza uburenganzira bwa muntu no guha abaturage ubwisanzure bwa politiki. Umunyamabanga wa Leta ushinzwe ububanyi n'amahanga Marco Rubio, yavuze ko ibi bihano " Bigabanya ubushobozi bw'ubutegetsi bwa Cuba bwo gukandamiza abaturage”.

Ku ruhande rwa Cuba, Minisitiri w’Ububanyi n’Amahanga Bruno Rodriguez yamaganye ibi bihano avuga ko “ Biteye agasuzuguro”, anashinja Amerika gukomeza kwivanga mu bibazo by’imbere muri Cuba.

Ibi bihano bishya byiyongereye ku bindi Amerika yari imaze iminsi ifatira abayobozi ba Cuba n'ibigo bifitanye isano n'igisirikare cy'icyo gihugu. Aho mu mezi ashize, Amerika yakajije ingamba z’ubukungu zirimo kugabanya uburyo Cuba ibona ibikomoka kuri peteroli ndetse no gushyira igitutu ku masosiyete mpuzamahanga akorana n’ibigo bya Leta ya Cuba.