Kinyarwanda
English
Swahili
Impinduka muri Loni: Bruno Lemarquis yavanywe muri RDC yimurirwa muri Afghanistan
Umunyamabanga Mukuru wa Loni, António Guterres, yatangaje ko yashyizeho Bruno Georges Lemarquis nk’Umuyobozi wungirije w’Intumwa idasanzwe ya Loni muri Afghanistan mu butumwa bwa Mission d’assistance des Nations Unies en Afghanistan (MANUA).
Nkuko byashyizwe ahagaragara ku wa 27 Mata 2026, Lemarquis azanakora inshingano z’Umuhuzabikorwa wa Loni muri icyo gihugu ndetse n’izijyanye n’ibikorwa by’ubutabazi.
Lemarquis asimbuye Indrika Ratwatte, Umunyamabanga Mukuru wa Loni yashimiye ku murimo mwiza yakoze mu gihe yari kuri uwo mwanya.
Mbere yo gushyirwa kuri izi nshingano nshya, Lemarquis yari Umuyobozi wungirije w’Intumwa ya Loni mu butumwa bwo kubungabunga amahoro no guteza imbere ituze muri Repubulika Iharanira Demokarasi ya Congo kuva mu 2022 aho yanakoraga nk’Umuhuzabikorwa wa Loni n’ushinzwe ibikorwa by’ubutabazi muri icyo gihugu.
Afite ubunararibonye bw’imyaka myinshi mu buyobozi no mu micungire y’ibikorwa bikorerwa mu bihugu bifite ibibazo bikomeye, by’umwihariko mu bijyanye n’iterambere, kugarura ubuzima busanzwe, ibikorwa by’ubutabazi n’amahoro.
Mbere y’akazi ke muri RDC, Lemarquis yakoreye Loni muri Haïti aho yari Umuyobozi wungirije w’Intumwa idasanzwe ndetse n’Umuhuzabikorwa wa Loni hagati ya 2020 na 2021. Yanakoze mu biro bishinzwe ibibazo by’amage mu muryango wa Programme des Nations Unies pour le développement, anoherezwa mu bihugu bitandukanye birimo Somalia, Haïti, Palestine na Cambodge.
Lemarquis yatangiye gukorera Loni mu 1992, mbere yaho akorera imiryango itari iya Leta mu bihugu nka Haïti na Ethiopie. Afite impamyabumenyi y’icyiciro cya kaminuza mu by’ubuhinzi bwo mu turere dushyuha yakuye mu ishuri rya Montpellier mu Bufaransa, kandi avuga neza Igifaransa n’Icyongereza.
