Kinyarwanda
English
Swahili
Umunyamakuru yishwe arashwe muri Mexique mu gihe Igikombe cy'Isi cyatangiraga
Umunyamakuru wo muri Mexique, Luis Ángel López Valdez, yishwe arashwe n’abagizi ba nabi mu Ntara ya Veracruz mu gihe igihugu kiri kwakira imikino ya mbere y’Igikombe cy’Isi cya 2026.
López Valdez yari umunyamakuru wa Vanguardia de Veracruz, ikinyamakuru cyo muri Leta ya Veracruz, ndetse akaba yanayoboraga urubuga rw'amakuru rwitwa Reportaje Policiaco Veracruzano, yarashwe ku manywa y’ihangu mu mujyi wa Poza Rica. Abashinzwe iperereza bavuga ko impamvu y’ubu bwicanyi itaramenyekana, ariko ko hari gukorwa iperereza kugira ngo hamenyekane ababugizemo uruhare.
Ishami rya Reporters Without Borders (RSF) ryamaganye ubu bwicanyi, rivuga ko ari "igitero gikomeye ku bwisanzure bwo gutanga ibitekerezo." Uyu muryango uvuga ko kuva mu mwaka wa 2000, abanyamakuru barenga 150 bamaze kwicirwa muri Mexique, mu gihe abandi 28 baburiwe irengero.
Perezida Claudia Sheinbaum yatangaje ko inzego za leta n’iz’intara ya Veracruz “ziri gukorana mu iperereza ryimbitse kuri uru rupfu kandi ababigizemo uruhare bagomba kubibazwa imbere y’ubutabera.”
Urupfu rwa López Valdez rwabaye mu gihe abakunzi b’umupira w’amaguru ku Isi yose bakurikiranga umukino wafunguye Igikombe cy’Isi hagati ya Mexique na Afurika y’Epfo.
