Umuraperi ubifatanya n'ishoramari Dr Dre yinjiye ku rutonde rushya rw'abatunze miliyari y'amadolali y'amerika. 

Ni lisite yashyizwe hanze na Forbes Magazine yo muri Werurwe 2026. Ubundi Dr Dre mu 2014 yigeze kwinginga Forbes ko bakwiriye guhindura intonde z'abatunze miliyali y'amadolali y'Amerika nawe ikamwongeraho.

Yabwiraga abavuniye ibiti mu matwi kuko baramwihoreye. Icyo gihe yari yagurishije 'headphones' zitwa Beats Music and Electronics kuri miliyali $3.

Ku wa 28 Gicurasi 2014 nibwo icyo gikorwa cyabaye. We yumvaga bihagije guhita aza ku rutonde rw'abaherwe.

Izo 'Headphones ' zari iza Dr Dre na Jimmy Lovine. Utwo dukoresho two kumva umuziki twagiye ku isoko mu 2008 ,aho iyo sosiyete yakoreraga I Santa Monica. Zaguraga $300 zikiza ku isoko.

Mu ntangiriro izo headphones zakorwaga n'uruganda rwitwa Monster Cable kugeza mu 2012. Nyuma zaje gukorwa HTC, yari isanzwe ikora mudasobwa. 

Ku rutonde rw'abaherwe batunze za miliyali Dr Dre ari ku mwanya wa 3332. Ruriho abahanzi nka Rihanna, Taylor Swift, Jay-Z n'abandi bashoramari bo mu zindi nzego.

Beyoncé mu bihe bitambutse yavuzweho gutunga miliyali y'amadolali y'Amerika ariko yaje kuri uru rutonde ari mushya. Abandi bariho barimo Donald Trump, Mark Zuckerberg, Jeff Bezzos, Bill Gates, Ophrah Winfrey,Rupert Murdoch.

Forbes Magazine yanditse ko abo mu isi y'imyidagaduro batunze za miliyali basaga 22. Barimo rero abahanzi; Jay-Z, Beyoncé,Bruce Springsteen,Rihanna, Taylor Swift na Dr Dre .

Elon Musk amaze imyaka ibiri ayoboye abaherwe. Kuri ubu abarirwa miliyali $839. Abikesha Tesla na SpaceX, sosiyete zihagaze neza akaba yitegura kuba umuherwe wa mbere uzatunga tiriyali.

Larry Page, nyiri Google ari ku mwanya wa kabiri na miliyali $257. Akurikirwa n'uwo bafatanyije Sergey Brin utunze miliyali $237.

 Jeff Bezos ari ku mwanya wa kane na miliyali $224, Mark Zuckerberg atunze miliyali $222. Donald Trump ari ku mwanya wa 645 akaba atunze miliyali $6.5. Kuva yajya ku butegetsi ubutunzi bwe bwazamutse ku kigero cya 27%.