Ku isaha ya saa Mbili n’igice z’ijoro nibwo umukino hagati ya Rayon Sports na Al Merrikh SC watangiye. Ni umukino atangiranye imbaraga nyinshi ku mpande zombi bijyanye n’uko ikirere cyari kimeze wabonaga kirimo gufasha abakinnyi.

Ikipe zombi zakomeje gukinira mu kibuga hagati ubona zitarema uburyo bwinshi ushobora kwemeza ko bwavamo ibitego.

Ku munota wa 32, ikipe ya Rayon Sports yarokotse cyane. Ni umupira mwiza wakuwemo na Kwizera Olivier wakuyemo ishoti rikomeye ryatewe na Nicholas Rijaniainia.

Igice cya mbere hagati ya Rayon Sports na Al Merrikh SC cyarangiye ikipe zombi zinganyije 0-0. Ni igice twabonye Al Merrikh SC igerageza uburyo bwinshi ariko kubona igitego biranga.

Ku munota wa 47, ikipe ya Rayon Sports yabonye amahirwe akomeye cyane ku mupira mwiza wahawe Sindi Paul Jesus ateye ishoti rikomeye umuzamu wa Al Merrikh SC awushyira muri Koroneri yatewe ntihagira ikivamo.

Ku munota wa 60, ikipe ya Rayon Sports yakoze impinduka, Bruno Ferry akuramo Aziz Bassane yinjizamo rutahizamu Ndikumana Asman.

Ku munota wa 62, ikipe ya Rayon Sports yabuze igitego cyabazwe. Ni umupira watewe na Uwumukiza Obed ahereza Sindi Paul Jesus ariko ateye n’umutwe umupira uca hejuru cyane y’izamu.

Ku  munota wa 64, ikipe ya Al Merrikh SC yahushije igitego bigizwemo uruhare na Kwizera Olivier. Ni umupira mwiza ikipe ya Al Merrikh SC yabonye uterwa na Obino Sogoba ariko Kwizera Olivier akora akazi ke neza.

Ku munota wa 66, Al Merrikh SC yakoze impinduka. Darko Novic yakuyemo abakinnyi barimo Razafimaro Gilles na Obino Sogoba yinjizamo Ishag Faisal na Mohamed Hashim.

Ku munota wa 90, ikipe ya Rayon Sports yabonye amahirwe yo gutsinda igitego ariko biranga. Ni umupira mwiza wahawe Fall Ngagne ateye ishoti umupira ukurwamo neza na ba myugariro ba Al Merrikh SC.

Umukino wa Rayon Sports na Al Merrikh SC warangiye ikipe zombi zinganyije 0-0. Ni umukino wari mwiza, urimo imbaraga nyinshi ku mpande zombi kuko ikipe zakinaga umukino wo kwatakana mu buryo bukomeye cyane.