Kinyarwanda
English
Swahili
&format=webp)
Abayobozi bane bafunzwe bazira gutanga ibyangombwa byo kubaka mu buryo butemewe
Urwego rw’Igihugu rw’Ubugenzacyaha, RIB, rwatangaje ko rwataye muri yombi abayobozi bane bo mu Turere dutandukanye, bagize uruhare mu gutanga ibyangombwa byo kubaka bitubahirije ibisabwa n’amategeko, aho bakurikiranyweho gukoresha ububasha bafite mu nyungu zabo bwite.
RIB yabitangaje kuri uyu wa 1 Gicurasi 2026.
RIB yabuze ko yafunze muri aba bayobozi bane yafunze barimo uwitwa Ishimwe Frank, wari ushinzwe imitangire y’ibyangombwa byo kubaka mu Karere ka Ngoma na Ntirenganya Epimaque, wakoraga nk’umuyobozi wa One Stop Center y’ubutaka mu Karere ka Gakenke, Niyomungeri Richard, wari Umunyambanga Nshingwabikorwa w’Umurenge wa Nzige mu Karere ka Rwamagana ndetse na Kwisinga Jean Norbert, ushinzwe imiturire mu Karere ka Rulindo.
Urwego rw'Ubugenzacyaha bwavuze ko aba bose bakurikiranyweho ibyaha byo gukoresha ububasha bahabwa mu nyungu zabo bwite no kutubahiriza igishushanyo mbonera cy’imikoreshereze y’ubutaka, aho bagiye batanga ibyangombwa byo kubaka ku bantu batandukanye batubahirije igishushanyo mbonera cyemejwe.
Uru rwego rw'Ubugenzacyaha rwatangaje ko hakiri gukorwa iperereza kuri ibi byaha bakurikiranyweho, hanategurwa dosiye zabo kugira ngo zishyikirizwe ubushinjacyaha.
RIB yatanze ubutumwa iburira abatanga ibyangombwa byo kubaka bitubahirije ibisabwa n’amategeko bagamije inyungu z’abantu bwite kubihagarika kuko bibangamiye imigendekere myiza y’imyubakire mu gihugu, kandi bikaba bihanwa n’amategeko.
