Ku cyumweru tariki 22 Werurwe 2026, ikipe ya Manchester City yakinnye na Arsenal FC ku mukino wa nyuma wa Carabao Cup.

Ni umukino wabereye kuri Wembley Stadium ahasanzwe n'ubundi habera uyu mukino wa nyuma buri mwaka. Ikipe ya Arsenal FC niyo yahabwaga amahirwe mbere y'umukino bitewe nuko yitwaraga ariko bigakubitiraho ni uko Manchester City yari imaze iminsi yitwara nabi.

Byaje kwicurika kuko muri uyu mukino ikipe ya Manchester City yarushije cyane Arsenal FC kuko wabonaga mu mikinire y'umutoza wa Arsenal FC, Mikel Arteta, atarimo gushaka kwataka izamu nkuko bisanzwe.

Igice cya mbere cyarangiye ikipe zombi zinganyije 0-0 ariko wabonaga Manchester City ari yo yihariye umupira cyane nubwo abasore bayo barimo Semenyo na Doku bagiye bahusha ibitego byabazwe.

Ku munota wa 60, ikipe ya Manchester yabonye igitego cya mbere gitsinzwe na Nico O'Reilly wari urimo gukina neza cyane. Ku munota wa 64, uyu musore yongeye gusubira atsinda Arsenal FC igitego cya kabiri ku burangare bwa myugariro.

Umukino warangiye ikipe ya Manchester City yegukanye igikombe cya Carabao Cup nyuma yo gutsinda Arsenal FC ibitego 2-0. Ikipe ya Arsenal FC yagowe cyane muri uyu mukino kuko imikinire yayo yatumye irushwa.

Iyi Carabao Cup ibaye iya Gatanu Manchester City itwaye itozwa na Pep Guardiola. Iki kibaye igikombe cya 19 Pep Guardiola atwaranye na Manchester City. Ibi bikombe birimo bitandatu bya Shampiyona, Super Cup imwe, Igikombe cy'isi cy'ama-Club kimwe, UEFA Champions league imwe, FA Cup enye, Carabao Cup eshatu na Community Shield eshatu.

Nico O'Reilly yafashije Manchester City gutwara igikombe cya Carabao Cup