Ni umukino wabaye ku wa Gatatu tariki 15 Ukwakira 2025 kuri Kigali Pele Stadium. Uyu mukino wabaye hakiri kare cyane kuko watangiye ku isaha ya saa Ine za mu gitondo amasaha Kiyovu Sports isanzwe ikoreraho rimwe na rimwe imyitozo.

Ni umukino ikipe ya Kiyovu Sports yorohewe nawo cyane ndetse abafana bari bahawe ikaze kuko kwinjira byari Ubuntu kuko wari uwo gukomeza kumenyereza abakinnyi bashya ndetse no gukomeza kwitegura neza Shampiyona irakomeza muri iyi wikendi.

Umukino waje kurangira ikipe ya Kiyovu Sports itsinze Virunga Academy y'abatarengeje imyaka 22 ibitego 4-0. Ni ibitego byatsinzwe na Cedrick Amissi watsinze igitego kimwe, Sanaja Moïse atsinda ibitego bibiri ndetse na Nsanzimfura Keddy.

Kiyovu Sports kugeza ubu iri ku mwanya wa 10 n'amanota 4 ku rutonde rw'agateganyo rwa Shampiyona kuko imaze gutsinda umukino umwe, inganya umwe itsindwa umwe. Umukino umwe rukumbi yatsinze ni uwo yahuye na AS Muhanga urangira Kiyovu Sports itsinze igitego 1-0.

Ku wa mbere w'icyumweru gitaha tariki 20, ikipe ya Kiyovu Sports izakina umukino w'umunsi wa Kane wa shampiyona na Musanze FC kuri Kigali Pele Stadium. Biteganyijwe ko uzatangira ku isaha ya saa Kumi n'ebyiri z'umugoroba.

Kiyovu Sports yatsinze Virunga Academy y'abatarengeje imyaka 22