Kinyarwanda
English
Swahili
Abakinnyi 23 bahawe amakarita y’umutuku kubera guterana ibipfunsi
Abakinnyi 23 bahawe amakarita atukura nyuma y’imirwano yabaye hagati ya Cruzeiro na Atlético Mineiro mu mukino wa nyuma wa Campeonato Mineiro wo mu gihugu cya Brazil.
Uyu mukino wabereye mu mujyi wa Belo Horizonte wo muri Brazil, aho Kaio Jorge yatsinze igitego kimwe rukumbi cyafashije Cruzeiro, itozwa n’uwahoze atoza ikipe y’igihugu ya Brazil Tite, gutsinda mukeba wayo Atlético Mineiro. Ibi byatumye Cruzeiro yegukana igikombe cya Leta ya Minas Gerais ku nshuro ya mbere kuva muri 2019.
Uyu mukino waranzwe n’imirwano ikomeye yabaye mu minota ya nyuma y’umukino, aho abashinzwe umutekano ndetse n’abapolisi byabaye ngombwa ko binjira mu kibuga kugira ngo batandukanye abakinnyi. Nyuma y’isesengura, abakinnyi 23 barimo n’uwahoze ari rutahizamu w’ikipe y’igihugu ya Brazil, Givanildo Vieira de Sousa, bahawe amakarita atukura nyuma y’umukino.
Imirwano yatangiye ubwo umunyezamu wa Atlético, Everson yasunikaga Christian akamugusha hasi, agashyira ivi ku gituza cy’uwo mukinnyi wa Cruzeiro wari wamugonze mu gihe yirukaga ku mupira wari uvuye mu bakinnyi.
Abakinnyi ba Cruzeiro bahise baza gutabara mugenzi wabo, basunika Everson bamugeza ku giti cy’izamu. Ibi byatumye n’abandi bakinnyi binjira muri iyo mirwano mu gihe abashinzwe umutekano bageragezaga kubatandukanya.
Nubwo umusifuzi Matheus Delgado Candançan atigeze atanga amakarita atukura mu gihe umukino wari ugikomeje, ibitangazamakuru byo muri Brazil birimo Globo byatangaje ko nyuma byagaragaye ko abakinnyi 23 bahawe amakarita y’umutuku kuko imirwano yari ikomeye ku buryo umusifuzi atabashije gutanga amakarita ku kibuga.
Ku ruhande rwa Cruzeiro, abakinnyi 12 barimo n’uwatsinze igitego Kaio Jorge bahawe amakarita atukura. Ku ruhande rwa Atlético Mineiro, abakinnyi 11 basohowe mu kibuga, barimo Renan Lodi wahoze akinira Atlético Madrid na Nottingham Forest, ndetse na Givanildo Vieira de Sousa.
Nyuma y’iyi mirwano, Givanildo Vieira de Sousa yavuze ko ibyabaye bibabaje. Yagize ati “Birababaje cyane. Ntitwagombaga gutanga urugero nk’urwo kuko bigera no ku isi yose. Dufite inshingano zo kurinda isura yacu n’iy’ikipe.”
Nubwo Cruzeiro yegukanye igikombe, amakipe yombi ntabwo ari kwitwara neza muri shampiyona ya Brazil Serie A y’uyu mwaka. Nyuma y’imikino ine, Atlético Mineiro iri ku mwanya wa 17 mu gihe Cruzeiro iri ku mwanya wa 19.
Tags:
