Spurs yigaruriye umukino kare cyane ndetse isoza igice cya mbere iyoboye ku manota 76-49, ariko Knicks yagarutse mu gice cya kabiri ishyushye aho Jalen Brunson yatsinze amanota 36 na OG Anunoby wongeyeho 33.

Umwogereza Anunoby ni we wabaye intwari ya Knicks nyuma yo gutsinda amanota abiri ya nyuma ku mupira yahawe na Brunson igihe umukino waburaga amasegonda 1.2 kugira urangire. Amanota yahaye intsinzi Knicks imbere y’abafana bari buzuye Madison Square Garden.

Brunson aganira n’itangazamakuru yavuze ko intsinzi ya 4 idakwiye gutuma Knicks yirara kuko igikombe kitaraboneka, “Na nubu tubifata nkaho ibintu bitararangira. Tugomba gukomeza kwitwara neza no kwitegura umukino ukurikiyeho.”

Ku ruhande rwa Spurs, Victor Wembanyama wari umaze kwitwara neza mu mukino wabanje, yasoje afite amanota 24 na rebounds 13 ariko ntiyabashije gufasha Spurs gukomeza umuvuduko batangiranye mu gice cya mbere aho Knicks yavuye inyuma amanota 29 mu gice cya kabiri.

"Twabaye abanyamururumba," Wembanyama yavuze nyuma y'umukino, agaragaza ko Spurs yatakaje umurongo n'imbaraga yari ifite mbere y'ikiruhuko. 

Umukino wa gatanu uteganyijwe kubera i San Antonio mu rukerera rwo ku wa Cyumweru tariki 11 Kamena, aho Knicks izaba ishaka gusoza series yegukana igikombe cya NBA ku nshuro ya gatatu mu mateka yayo, mu gihe Spurs izaba iharanira gutsinda kugira yongere amahirwe yo kwegukana igikombe iheruka muri 2014.

Karl Anthony Towns na OG Anunoby bishimira intsinzi ku mukino wa 4

Taylor Swift mu byamamare byitabiriye uyu mukino