Nk’uko bivugwa na Gérard Mbarushimana, Umuyobozi wa IBUKA mu Karere ka Rubavu, umuryango uhuriza hamwe abarokotse Jenoside, urwibutso rwa mbere rwa Jenoside rwa Bigogwe rwari rutarubakwa ku buryo bukwiye kandi rwaburaga ibikoresho by’ibanze, birimo n’igice cyihariye cy’amateka.

Yagize ati “Urwibutso rwa kera rwa Jenoside rwa Bigogwe rwari rumaze gusa n’irimbi ry’abazize Jenoside. Ntirwuzuzaga ibisabwa kugira ngo rwitwe urwibutso nyarwo rwa Jenoside, bitandukanye n’uru rushya rwubatswe bundi bushya.”

Yagaragaje ko urwibutso rwubatswe bundi bushya rwavuguruwe rwose ndetse runagurwa, harimo n’igice cy’amateka, byose bigerwaho ku bufatanye n’Akarere ka Rubavu.

Mbarushimana yakomeje agira ati: “Gutangiza no kubika inyandiko zivuga ku rugero rukabije rw’ubwicanyi ndetse n’amateka y’aya mahano yabereye i Bigogwe bizagira akamaro gakomeye ku barokotse Jenoside bo muri aka gace ndetse no ku gihugu cyose muri rusange, kuko bizafasha mu kurinda amateka yacu kutibagirana.”

Yibukije ko ubwicanyi bwabereye mu gace ka Bigogwe, kari kagizwe ahanini n’iyahoze ari Komini Mutura na Rwerere, bwakozwe ahanini n’“abasirikare ba commando baturukaga mu kigo cya gisirikare cya Bigogwe”, ndetse ngo bakaba baranifashishaga Abatutsi baho nk’aho bari kubakoraho imyitozo yo kurasa no kwica. 

Urwibutso rwa Jenoside rwa Bigogwe rwaguwe ruzaba ari ahantu h’icyubahiro h’iherezo ku mugaragaro h’abazize Jenoside 9,042 bishwe mu duce tugize Akarere ka Nyabihu n’aka Rubavu muri iki gihe.

Nk’uko Akarere kabitangaza, Urwibutso rwa Bigogwe ubu rufite imva rusange iri mu nsi y’ubutaka, urumuri rw’icyizere, uburyo bwo kurwanya inkongi y’umuriro, kamera z’umutekano (CCTV), igice cy’amateka, ahakirirwa abashyitsi, inzu y’inama, biro ndetse n’ubusitani bw’urwibutso.