Kinyarwanda
English
Swahili
&format=webp)
Louise Mushikiwabo yakiriye intumwa ya Canada baganira ku guteza imbere urubyiruko
Umunyamabanga Mukuru w’Umuryango w’Ibihugu bikoresha Ururimi rw’Igifaransa (OIF), Louise Mushikiwabo, yakiriye mu biro bye Minisitiri w’Intebe w’Intara ya Nouveau-Brunswick muri Canada, Susan Holt, bagirana ibiganiro byibanze ku guteza imbere urubyiruko n’ubufatanye mu by’ubukungu.
Muri uru ruzinduko rwabaye kuri uyu wa 02 Mata 2026, Mushikiwabo yashimye uruhare ruhoraho rwa Nouveau-Brunswick mu bikorwa bya OIF, cyane cyane mu guteza imbere urubyiruko, uburezi, amahugurwa ndetse n’ubufatanye mu bukungu.
Yagaragaje ko inkunga n’imikoranire y’iyi ntara ikomeje kugira uruhare rukomeye mu gushyigikira gahunda zigamije kuzamura ubushobozi bw’urubyiruko mu bihugu bigize uyu muryango.
Ku ruhande rwe, Susan Holt yatangaje ko Nouveau-Brunswick igiye gutanga inkunga yihariye igenewe OIF, izifashishwa mu gushyigikira ibikorwa byita ku rubyiruko rukoresha Igifaransa.
Iyi nkunga yakiriwe neza n’Umuryango wa OIF, wavuze ko izafasha kongerera imbaraga gahunda zigamije guteza imbere ubumenyi, amahugurwa ndetse no gufasha urubyiruko kubona akazi.
Ubuyobozi bwa OIF bwagaragaje ko buzakomeza gushimangira ibikorwa bigamije kuzamura imibereho n’iterambere ry’urubyiruko mu bihugu biwugize, binyuze mu bufatanye n’abafatanyabikorwa batandukanye.
