Iyi nzu y’amateka yubatswe ku Rwibutso rwa Jenoside rw’Akarere ka Ruhango ruherereye mu Murenge wa Kinazi, aho biteganyijwe ko izajya yakira abashyitsi, abanyeshuri n’abandi bose bifuza gusobanukirwa amateka ya Jenoside yakorewe Abatutsi mu 1994 muri aka gace.

Iyi nyubako igizwe n’ibice bitandukanye birimo igice kizashyirwamo inyandiko n’ibimenyetso by’amateka, ahazashyirwa ibikoresho by’ikoranabuhanga bizajya byifashishwa mu gusobanura amateka mu buryo bugezweho, ndetse n’igice kizandikwamo amazina kinashyirwemo amafoto y’abazize Jenoside bo muri aka gace ka Mayaga.

Abahagarariye abarokotse Jenoside yakorewe Abatutsi mu 1994 muri aka gace bavuga ko iyi nzu igiye kugira uruhare rukomeye mu kubungabunga amateka no kuyigisha urubyiruko ndetse n’abandi bose bifuza kuyamenya.

Umuyobozi w’ihuriro AGSF, Evode Munyurangabo, avuga ko kuba iyi nzu yuzuye mbere yo kwinjira mu gihe cyo Kwibuka ku nshuro ya 32 Jenoside yakorewe Abatutsi mu 1994 ari ikimenyetso kiza cyo kubungabunga amateka no kuyigisha abakiri bato hagamijwe kwirinda ko Jenoside yakongera kubaho ukundi.

Yagize ati “Twishimiye ko tugiye kwibuka ku nshuro ya 32 Jenoside yakorewe Abatutsi mu 1994 dufite inzu y’amateka. Turashimira ubuyobozi bw’Igihugu n’Akarere ka Ruhango badufashije kuyubaka, kuko izabera ishuri abazadukomokaho bitume bakamenya amateka y’akababaro Jenoside yasize iwacu ku Mayaga bakure birinda icyatuma yongera kubaho.”

Perezida w’Inama Njyanama y’Akarere ka Ruhango, Gasasira Jerome, avuga ko iyi nzu y’amateka izaba igicumbi cy’ubumenyi ku mateka ya Jenoside yakorewe Abatutsi mu Mayaga, ikanagira uruhare rukomeye mu gukomeza ubukangurambaga bwo kurwanya ingengabitekerezo ya Jenoside no gusigasira amateka.

Biteganyijwe ko iyi nzu izajya isurwa n’abanyeshuri, abashakashatsi n’abandi bashaka kumenya amateka ya Jenoside yakorewe Abatutsi mu 1994, mu rwego rwo gukomeza kubaka ejo hazaza hadashingiye ku ivangura n’urwango.