Mu ijoro rya cyeye tariki 8 Gicurasi 2025, ikipe zirimo Manchester United na Tottenham Hospurs zageze ku mukino wa nyuma wa UEFA Europa League nyuma yo kwitwara neza muri 1/2.

Ikipe ya Manchester United yageze ku mukino wa nyuma itsinze ikipe ya Athletic Bilbao ku giteranyo cy’ibitego 7-1. Umukino ubanza wahuje aya makipe warangiye ikipe ya Manchester United itsinze ibitego 3-0 naho umukino wo kwishyura urangira ari ibitego 4-1.

Ikipe ya Tottenham Hospurs nayo yaraye igeze ku mukino wa nyuma w’iri rushanwa nyuma yo kwitwara neza imbere ya Bodo/Glimt, igatsinda ibitego 5-1. Umukino ubanza wahuje aya makipe yombi warangiye ikipe ya Tottnham Hospurs itsinze ibitego 3-1 naho umukino wo kwishyura urangira ari ibitego 2-0.

Nyuma yaho aya makipe 2 ageze ku mukino wa nyuma byamaze kwemezwa ko amakipe 6 umwaka utaha ari yo azitabira imikino y’i burayi ya UEFA Champions League.

Ikipe ya Arsenal FC niyo yahaye amanota Shampiyona y’ubwongereza nyuma yo kugera muri 1/2 cya UEFA Champions League nubwo bitakunze neza igasezererwa na Paris Saint-Germain.

Kugeza ubu Shampiyona y’ubwongereza izohereza amakipe 5 mu gihe yari isanzwe yohereza amakipe 4 ndetse hakaziyongeraho imwe izava muri izi zizahurira ku mukino wa nyuma w’igikombe cya UEFA Europa League, zose hamwe zikaba 6.

Ni amateka akomeye Shampiyona y’ubwongereza igiye gukora kuko nta kindi gihe ibi byigeze biba muri Shampiyona zikomeye ku mugabane w’i burayi.

Urugamba rwo kubona ikipe 4 zizajya muri UEFA Champions League umwaka utaha rurakomeye cyane kuko ikipe zirimo Manchester City, Arsenal FC, Nottingham Forest, Newcastle United na Chelsea FC zose ziracyakubana. Ikipe 4 zizaboneka ziziyongera kuri Liverpool FC yamaze gutwara igikombe cya Shampiyona y’ubwongereza.