Mbere y’igitaramo cye, The Ben yagaragaje ko akunda cyane umuziki wa Uganda. Yavuze ko akurikira abahanzi nka Ray G, Joshua Baraka na Laika, ndetse anavuga ko akunda indirimbo zabo. Yongeyeho ko akunda cyane abahanzi b’inararibonye bo muri Uganda barimo Jose Chameleone, Bebe Cool na Bobi Wine.

Igitaramo cya The Ben muri Kampala kiri kubera kuri Serena Hotel, kuva saa kumi z’umugoroba kugeza saa mbili n’igice z’ijoro. Iki gitaramo ni kimwe mu bigize uruzinduko rwe rw’isi yose aho ari kumurika album ye nshya. Abakunzi be biteze kumva indirimbo nshya ndetse n’izakunzwe cyane.

Nubwo amaze iminsi avugwa mu itangazamakuru kubera ko aherutse kwibaruka umwana we wa mbere, The Ben yavuze ko yishimira uburyo abafana be bamugaragariza urukundo. Yagize ati: “Banyereka urukundo cyane, abafana bange ndabakundsa cyane niyo mpamvu nange mpora nshakisha igituma bahorana ibyishimo".

Album nshya ya The Ben yitwa Plenty Love yasohotse ku itariki ya 31 Mutarama 2025. Iyi album ikubiyemo indirimbo z’urukundo n’ubuzima busanzwe, kandi iri kumurikwa mu bitaramo bitandukanye hirya no hino ku isi. The Ben amaze kuyimurikira mu bihugu bitandukanye birimo u Bubiligi, Canada, ndetse ateganya no kuyimurikira muri Leta Zunze Ubumwe za Amerika na Australia.

The Ben ni umwe mu bahanzi b’Abanyarwanda bafite izina rikomeye muri Afurika y’Iburasirazuba. Yakoze indirimbo zakunzwe cyane nka “Why” yakoranye na Diamond Platnumz, “Habibi”, “Vazi”, “Ni Forever” na “Fine Girl”. Ibitaramo bye bikurikirwa n’abantu benshi, kandi akomeje guteza imbere umuziki nyafurika ku rwego mpuzamahanga.

Igitaramo cya The Ben muri Kampala ni ikimenyetso cy’uko umuziki nyafurika ukomeje gutera imbere, kandi abahanzi b’Abanyarwanda nka The Ben bakomeje kugaragaza impano zabo ku rwego mpuzamahanga.