Ibi yabigarutseho mu kiganiro n’itangazamakuru kuri uyu wa Gatandatu tariki 17 Gicurasi 2025 muri BK Arena, cyagarukaga ku myiteguro y'imikino ya BAL 2025 mu itsinda rya 'Nile Conference' mu gushaka itike y’imikino ya nyuma ya BAL, izabera muri Afurika y'Epfo.

Muri iki kiganiro kandi Clare Akamanzi usanzwe ari Umuyobozi wa NBA Africa yari kumwe na Amadou Gallo Fall, Umuyobozi wa BAL.

Clare Akamanzi yavuze ko iri rushanwa riri kuba ku nshuro ya Gatanu, ryatanze umusaruro mu myaka ine ishize rikinwa kandi ko mu myaka 10 iri mbere uzakomeza kuzamuka.

Yagize ati: "Umusaruro wa BAL mu myaka ine ishize uragaragara cyane kuko igira uruhare mu kuzamura ubukungu. Ibihugu byakiriye BAL byose hamwe mu myaka yatambutse byakuyemo agera kuri miliyoni $250. Ikindi ni imirimo yatanzwe igera ku bihumbi 37."

Yakomeje avuga ko ikifuzwa mu myaka 10 iri imbere ari uko umusaruro uva muri BAL uzava kuri miliyoni $250 ukagera kuri miliyari $4,5 ndetse abagera ku bihumbi 650 bakaba babona akazi muri iki gikorwa.

Uyu muyobozi kandi yavuze ko uyu munsi wa none muri Afurika hari Arena zigera kuri 5 ziteguye kwakira imikino ndetse zujuje ibisabwa ku rwego rwa NBA.

Clare Akamanzi avuga ko bifuza ko mu myaka 10 iri imbere BAL izinjiza miliyari $4,5