Ku munsi wo ku wa Kabiri tariki 23 Ukuboza 2025, ikipe y'igihugu ya Uganda yakinnye umukino wa mbere mu gikombe cy'Afurika n'ikipe y'igihugu ya Tunisia birangira itsinzwe ibitego 3-1 mu mukino yarushijwe cyane w'itsinda rya C.

Mbere y'uyu mukino benshi baherezaga amahirwe Tunisia ariko ntibibagirwe ko ikipe y'igihugu ya Uganda nayo ishobora kugira icyo ikora bitewe nuko yitwaraga muri ibi bihe ndetse n'abakinnyi bakomeye wavuga ifite.

Byaje gutangira ku munota wa 10 gusa, ikipe y'igihugu ya Tunisia ibona igitego cya mbere gitsinzwe na Ellyes Skhiri, Tunisia yatsinze igitego cya Kabiri ku munota wa 40 gitsinzwe na Elias Achouri. Ikipe y'igihugu ya Uganda ntabwo yabashije kwihagararaho muri uyu mukino kuko yaje gutsindwa igitego cya gatatu gitsinzwe na Elias Achouri ku munota wa 64.

Iyi kipe ya Uganda yaje gukora impinduka Denis Omedi yinjira mu kibuga atangira kugenda agerageza amashoti ya kure ndetse ku munota wa 92, yaje gukora akantu atsinda igitego kimwe rukumbi iyi kipe y'igihugu ya Uganda yabonye muri uyu mukino.

Ntabwo ari uyu mukino gusa wabaye ku wa Kabiri, kuko n'ikipe y'igihugu ya Tanzania yatsinzwe na Nigeria ibitego 2-1 mu mukino nawo wo mu itsinda C. Tanzania yihagazeho ariko abakinnyi bayo bugarira bagira uburangare cyane bituma babura n'inota rimwe muri uyu mukino.

Ikipe y'igihugu kandi ya DRC yatsinze ikipe y'igihugu ya Benin igitego kimwe ku busa ndetse n'ikipe y'igihugu ya Senegal yabonye amanota atatu nyuma yo gutsinda ikipe y'igihugu ya Botswana ibitego 3-0. Iyi mikino yari iyo mu itsinda D.

Kuri uyu wa Gatatu iyi mikino y'igikombe cy'Afurika iraza gukomeza hakinwa imikino yo mu itsinda E ndetse no mu itsinda F. Imwe mu mikino ihari, Burikina Faso irakina na Equatorial Guinea, Algeria irakina na Sudani, Cote D'Ivoire irakina na Mozambique naho Cameroon ikine na Gabon.

Ikipe y'igihugu ya Tunisia yatsinze Uganda ibitego 3-1

Ikipe y'igihugu ya Nigeria yatsinze Tanzania ibitego 2-1

Ikipe y'igihugu ya Senegal yanyagiye Botswana ibitego 3-0