Umukino wabanje ni uwahuje Arsenal FC na Athletic Bilbao yo mu gihugu cya Esipanye warangiye Arsenal FC itsinze ibitego 2-0. Uyu mukino watangiye ku isaha ya saa Kumi n'ebyiri na 45 z'umugoroba.

Ni umukino utari woroshye cyane kuko iyi kipe ibarizwa mu Bwongereza yaje gutangira gutsinda mu gice cya Kabiri Kandi nabwo iminota irimo kurangira. Ku munota wa 72, nibwo Gabriel Martinelli yatsindiye Arsenal FC igitego cya mbere ku mupira yahawe na Lisandro Trossard naho ku munota wa 87, Trossard atsinda igitego cya Kabiri ku mupira yahawe na Gabriel Martinelli.

Undi mukino watangiye kuri iyi saha ni uwahuje PSV Eindhoven na Union St.Gilloise warangiye ikipe ya Union St.Gilloise itsinze ibitego 3-1.

Imikino yari itegerejwe cyane ni iyatangiye ku isaha ya saa tatu z'ijoro harimo uwahuje Real Madrid FC na Marseille. Uyu mukino waje kurangira Real Madrid yitwaye neza itsinda ibitego 2-1.

Ni umukino utayoroheye kuko ku munota wa 72, Dani Carvajal yaje guhabwa ikarita y'umutuku nyuma yo gukora ikosa rikomeye. Real Madrid FC yari yatsinze igitego cya mbere ku munota wa 29 gitsinzwe na Kylian Mbape kuri Penalite. Iki gitego cyaje cyishyura icyatsinzwe na Olimpique Marseille ku munota wa 22 gitsinzwe na Timothy Weah.

Umukino ugiye kurangira ku munota wa 81, Real Madrid yaje guhabwa indi Penalite yongera gutsindwa na Kylian Mbape wari wanateye iya mbere yanavuyemo igitego cya mbere.

Indi mikino yakinwe harimo uwo Borussia Dortunond yanganyijemo na Juventus ibitego 4-4, uwo Tottenham Hotspur yatsinzemo Villarreal igitego 1-0 ndetse n'uwo Benefica yatsinzwemo na Qarabag FK ibitego 3-2.

Iyi mikino ya UEFA Champions League irakomeza no kuri uyu wa Gatatu tariki 17 Nzeri 2025. Umwe mu mikino itegerejwe harimo uwurahuza Bayern Munich na Chelsea FC ndetse n'uwurahuza Liverpool FC na Atletico Madrid.

Real Madrid yatsinze Marseille 

Kylian Mbape yaraye atsinze ibitego 2 

Arsenal FC yatsinze Athletic Bilbao ibitego 2-0