Nk’uko byatangajwe n’Umuyobozi Mukuru wa Oman Air, Con Korfiatis, izi ngendo z’indege zizatangira muri Kamena 2026. Ibi byatangajwe mu gihe Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, ari mu ruzinduko rw’akazi muri Oman.

Uyu muhango wo gusinya amasezerano y’indege witabiriwe n’intumwa z’u Rwanda zirimo Minisitiri w'ububanyi n'amahanga Olivier Nduhungirehe, Minisitiri w’Imari n’Igenamigambi Yusufu Murangwa, Minisitiri w’Ikoranabuhanga n’Udushya Paula Ingabire, Umuyobozi Wungirije wa RDB Juliana Muganza, ndetse n’Umunyamabanga wa Leta muri Minisiteri y’Ibikorwaremezo Jean De Dieu Uwihanganye.

Mu murwa mukuru Muscat, intumwa z’u Rwanda n’iza Oman zasinye amasezerano ane y’ubufatanye (MoUs) agamije gushimangira umubano w’ibihugu byombi mu nzego z’ingenzi zirimo ubwikorezi, ibikorwaremezo, ikoranabuhanga n’iterambere ry’ubukungu.

Amwe muri ayo masezerano arebana n’ikorwa rya serivisi z’ibikoresho n’ibicuruzwa, zirimo iterambere n’imicungire y’ibyambu by'imbere mu gihugu n’imiyoboro y’ibitwara ibicuruzwa, byose biyobowe na Minisiteri y’Ibikorwaremezo. Ayandi masezerano arebana n’ubwikorezi, akaba ari yo azafasha gutangiza ku mugaragaro ingendo z’indege za Oman Air ziva Muscat zijya Kigali.

Hari kandi amasezerano yashyizweho hagati y’Urwego rw’Iterambere ry’u Rwanda (RDB) n’Ikigo gishinzwe imicungire y’Ibibuga by’Indege muri Oman (Oman Airports Management Company), agamije guteza imbere ishoramari rishingiye ku mushinga w’Ikibuga cy’Indege gishya cya Bugesera Airport.

Amasezerano ya kane yibanze ku ikoranabuhanga n’udushya, aho Minisiteri zombi z’Ikoranabuhanga zemeranyije gufatanya mu byerekeye kubika amakuru, serivisi zo mu ikoranabuhanga rya cloud, n’imicungire ya za data centers.

Aya masezerano agaragaza intambwe ikomeye mu kwagura ubufatanye hagati y’u Rwanda na Oman mu nzego z’ubukungu, ibikorwaremezo n’ikoranabuhanga.

U Rwanda rusanzwe rufitanye umubano mwiza na Sultanate ya Oman kuva kera. Mu 2016, kompanyi yo muri Oman ya Mawarid Mining LLC yasinye amasezerano y’imyaka itatu yo gukora ubucukuzi bw’amabuye y’agaciro mu Karere ka Karongi. Mu 2020, u Rwanda kandi rwakiriye imurikabikorwa ry’ibikomoka muri Oman (OPEX) ryabereye muri Kigali Convention Centre, ryahuje ibigo n’inganda zirenga 80.

Ubukungu bwa Oman bushingiye ku nzego zitandukanye zirimo gutunganya ibiribwa, ibikoresho by’ubwubatsi, ibikoresho byo mu rugo, uburezi, ubukerarugendo, amavuta, ubukorikori n’ubugeni. Gutangiza ingendo z’indege hagati ya Muscat na Kigali biteganyijwe ko bizarushaho gushimangira ubufatanye mu bukungu, umuco n’ubukerarugendo hagati y’ibihugu byombi.