Iyi nkuru isa nk'iyatunguranye mu matwi y'Abakurikiranira hafi Politiki y'Akarere, dore ko Perezida Tshisekedi yari yararahiye ko mu gihe akicaye mu biro nk'umukuru w'Igihugu cya DRC ''atazigera na rimwe aganira n'inyeshyamba za M23''.

Gusa koko yabaye nk'ubishyira mu bikorwa, kuko yahise abihimisha kwirengagiza M23 nk'umutwe w'Igisirikare ugizwe n'Abanye-Congo barwanira uburenganzira bwabo ndetse n'ubwa bene wabo bakomeza kwicwa mu burasirazuba bwa Congo ndetse abandi basaga ibihumbi ijana bakaba ari impunzi mu Rwanda ndetse n'ibindi bihugu by'ibituranyi.

Ku mugoroba wo kuri uyu wa 11 Werurwe 2025, Ibiro bya Perezida w'Angola byatangaje ko mu minsi iri imbere iki gihugu kigiye kwakira ku meza y'ibiganiro intumwa zihagarariye umutwe wa M23 ndetse n'izihagarariye Leta ya Repubulika iharanira Demokarasi ya Congo.

Zimwe mu mpamvu zateye Perezida Tshisekedi kwemera ibiganiro na M23:

Perezida Tshisekedi yamenye neza uwo bahanganye: Kuva umutwe wa M23 wakubura imirwano kuri Leta ya Kinshasa, Perezida Tshisekedi yumvikanye kenshi avuga ko yatewe na Leta y'u Rwanda, mu gihe umutwe wa M23 ari abanye-Congo baharanira uburenganzira bwabo ndetse bakanicwa mu burasirazuba bwa Congo.

Gutsindwa kwa Poropaganda na Dipolomasi bishingiye ku binyoma: Ni kenshi Perezida Tshisekedi ndetse n'abagize Leta bagiye bumvikana bagereka ibibazo ku Rwanda, bagakingingira ikibaba umutwe w'iterabwoba wa FDLR wasize ukoze Genocide mu Rwanda.

Kuba amahanga yaramaze kubona ko Leta ya Kinshasa ikorana ku mugaragaro na FDLR ndetse n'Abacanshuro:

Mu mpera z'ukwezi kwa mbere, umutwe wa M23 werekanye  abazungu b'Abacancuro bifatanyaga n'ingabo za Leta (FARDC), Wazalendo, ingabo z'Abarundi ndetse na FDLR mu ku rwanya umutwe wa M23 kandi gukoresha abacanshuro bitemewe.

Ni mu gihe muri Gashyantare umutwe wa M23 werekanye abarwanyi 14 ba FDLR bafatiwe ku rugamba ubwo uyu mutwe wafataga umujyi wa Goma ku wa 27 Mutarama 2025. Aba barwanyi ba FDLR kandi kandi bari bayobowe na Generale Gakwerere Jean Baptiste, bakaba bari bambaye impuzankano y'igisirikare cya Leta ya Congo (FARDC).

Kuba yarakerensheje umutwe wa M23 kugeza umufatanye ibice bikomeye harimo umujyi wa Goma na Bukavu:

Umutwe wa M23 kuva wagaba ibitero mu mwaka wa 2021, Leta ya congo yabifashe nk'ibisanzwe ukomeza kwigarurira ibice bitandukanye kandi bikomeye muri Kivu ya Ruguru, cyane cyane kazarusenya iba umujyi wa Goma wafashwe ku wa 27 Mutarama 2025.

Aba barwanyi kandi bakurikijeho kwigarurira ibice bitandukanye muri Kivu y'Epfo harimo Ikibuga cy'indege cya Kavumu, Umujyi wa Bukavu, inkengero za Uvira ndetse n'imipaka yose Congo ihuriraho n'u Rwanda.