Ikinyamakuru SOS Mediaburundi dukesha iyi nkuru, cyanditse ko mu ntara ya Cibitoke, mu majyaruguru y'Uburengerazuba bw'Uburundi, hakomeje kubera imyitozo minini ya gisirikare ikorwa n’urubyiruko rw’Imbonerakure rwibumbiye mu ishyaka riri ku butegetsi (CNDD-FDD).

Iyi myitozo irimo gutangwa ngo n'abahoze ari abarwanyi ba CNDD-FDD n’abo mu ngabo z’igihugu cy’Uburundi (FDNB) ndetse n’abarwanyi ba FDLR. Amakuru avuga ko izi mbonerakure zirimo kwigishwa  ikoreshwa ry’intwaro ziremereye n’intoya, gukusanya amakuru ku mwanzi n’ibindi bitandukanye.

 SOS Media, ivuga ko ababikurikiranira hafi bavuga ko aya masomo atangwa kuri uru rubyiruko, ashobora kuba ifitanye isano  no kwinjizwa mu ntambara iri hagati y’inyeshyamba za M23 n’ingabo za Kongo mu burasirazuba bwa Repubulika Iharanira Demokarasi ya Kongo. Gusa ngo  umuyobozi wa Batayo ya 112 y'ingabo z’abasirikare bakorera mu Ntara ya  Cibitoke, yavuze ko urusaku rw'amasasu rwumvikanye muri kariya gace ari imyitozo ya gisirikare isanzwe.