Kinyarwanda
English
Swahili
ADF yishe abasivili babiri mu gace ka Beni muri Kivu y’Amajyaruguru
Abasivili babiri bishwe ku wa Kane tariki ya 12 Gashyantare 2026, biciwe mu gace ka Ilimba kari ku muhanda wa Oicha–Mantumbi, muri teritwari ya Beni, intara ya Kivu y’Amajyaruguru mu Burasirazuba bwa Repubulika Iharanira Demokarasi ya Congo.
Aya makuru yemejwe n’imiryango ihagarariye sosiyete sivile muri aka gace, yatangaje ko aba baturage bishwe n’inyeshyamba z’Abagande z’umutwe wa ADF.
Allied Democratic Forces (ADF) ni umutwe w’inyeshyamba washingiwe muri Uganda mu myaka ya 1990, uza kwimukira mu mashyamba ya Beni na Ituri muri RDC. Uyu mutwe umaze imyaka ushinjwa kugaba ibitero ku baturage, kwica, gushimuta no gusenya ibikorwa remezo muri Kivu y’Amajyaruguru.
Teritwari ya Beni, by’umwihariko ku muhanda wa Oicha–Mantumbi, isanzwe ari hamwe mu hantu hakunze kugaragaramo umutekano muke bitewe n’ibikorwa by’uyu mutwe.
Abahagarariye sosiyete sivile muri Beni basabye inzego z’umutekano kongera ibikorwa byo kurinda abaturage no gukaza amarondo muri ako gace, mu rwego rwo gukumira ibindi bitero bishobora kubagiraho ingaruka.
Kuva mu ntangiriro z’uyu mwaka wa 2026, ibikorwa by’imitwe yitwaje intwaro birimo ADF bikomeje kongera ubukana mu bice bitandukanye bya Kivu y’Amajyaruguru, bikaba byaratumye abaturage benshi bahunga ingo zabo.
