Kinyarwanda
English
Swahili
&format=webp)
Tshisekedi yakojeje agati mu ntozi: Hateguwe imyigaragambyo yo kurinda itegeko nshinga
Ihuriro rya politiki rya Alternative 2028 muri Repubulika Iharanira Demokarasi ya Congo (RDC) ryahamagariye abaturage gukora umunsi wo guhagarika ibikorwa byose ku wa Gatatu tariki ya 3 Kamena 2026, mu rwego rwo kwamagana umugambi rivuga ko ugamije guhindura Itegeko Nshinga no gufungurira Perezida Félix Tshisekedi inzira yo kwiyamamariza manda ya gatatu.
Mu butumwa ryashyize ahagaragara, iri huriro ryasabye abaturage kuguma mu ngo zabo no kudakora ibikorwa bisanzwe by’ubuzima bwa buri munsi, nk’uburyo bwo kugaragaza ko batemera uwo mugambi.
Alternative 2028 ivuga ko Itegeko Nshinga atari ryo ribangamira imibereho myiza y’Abanyekongo, ahubwo ko ikibazo kiri mu ishyirwa mu bikorwa ry’inshingano z’ubuyobozi no mu micungire y’ibibazo byugarije igihugu.
Iri huriro ryibukije ko ingingo zitandukanye z’Itegeko Nshinga, zirimo iya 47, iya 48 n’iya 58, ziteganya inshingano za Leta zo kurengera abaturage no guteza imbere imibereho yabo, bityo rikavuga ko guhindura Itegeko Nshinga bitari igisubizo ku bibazo bihari.
Ihamagarira ryo guhagarika ibikorwa byose rije mu gihe impaka zikomeje kwiyongera muri RDC ku birebana n’ibivugwa ku mugambi wo kuvugurura Itegeko Nshinga.
Abatavuga rumwe n’ubutegetsi hamwe n’imiryango imwe n’imwe ya sosiyete sivile bakomeje kugaragaza impungenge ko izo mpinduka zishobora gutuma manda za Perezida ziyongera, mu gihe ubutegetsi bwa Perezida Félix Tshisekedi butaragira icyo butangaza kuri iri hamagarira ryatanzwe na Alternative 2028.
Nibiramuka bishyizwe mu bikorwa, iri hamagarira rishobora kugira ingaruka ku bikorwa by’ubucuruzi, ubwikorezi n’izindi serivisi mu bice bitandukanye by’igihugu kuri uwo munsi.
Tags:
