Yabitangaje ku wa 14 Gashyantare 2026, ubwo yitabiraga Inama y’Abakuru b’Ibihugu na za Guverinoma y’Umuryango wa Afurika Yunze Ubumwe yabereye i Addis Ababa muri Ethiopia. Iyo nama yasuzumye raporo ya 2025 ku mahoro n’umutekano ku mugabane wa Afurika.

“Ubutabera ni ingenzi mu biganiro by’amahoro”

Mu ijambo rye, Minisitiri w’Intebe yavuze ko amahoro arambye muri Afurika ashingira ku gukemura imizi y’ibibazo birimo imiyoborere mibi, ubusumbane mu bukungu ndetse no guhezwa mu mibereho rusange.

Yagaragaje kandi ko u Rwanda rukomeje kugira uruhare mu butumwa bwo kubungabunga amahoro mu bihugu bitandukanye birimo Mozambique na Central Africa.

Ku kibazo cya RDC, yashimangiye ko ari ngombwa ko impande zose zubahiriza imyanzuro n’amasezerano byagezweho mu biganiro mpuzamahanga byabanje. Yavuze ko hari impungenge ku kuba ubutegetsi bwa RDC butarubahirije byuzuye ibyo bwiyemeje.

Ati: “Ibihugu bifite uruhare rutaziguye mu ntambara ntibikwiye kuba abahuza, kuko kubogama bishobora guhungabanya icyizere gikenewe mu biganiro.”

Kugeza ubu, amakuru aturuka mu karere agaragaza ko u Burundi bufite ingabo mu burasirazuba bwa RDC zifatanya n’iza Leta ya Congo, umutwe wa FDLR, imitwe ya Wazalendo ndetse n’abacanshuro, mu mirwano bahanganyemo n’umutwe wa M23 na MRDP Twirwaneho. Iyi mirwano yakomeje kuvugwamo ibitero bigira ingaruka ku baturage b’inzirakarengane.

Uruhare rwa AU mu gushimangira ubuhuza

Abasesenguzi bagaragaza ko Umuryango wa Afurika yunze ubumwe ushobora kurushaho gukoresha inzego zawo zashyizweho mu buhuza, zirimo itsinda ry’abahuza riyobowe na Perezida wa Togo, Faure Essozimna Gnassingbé, mu rwego rwo gufasha impande za Congo kugera ku gisubizo kirambye.

Ibi bije mu gihe ikibazo cy’umutekano mu burasirazuba bwa RDC gikomeje kuba imwe mu mbogamizi zikomeye ku mahoro n’iterambere by’akarere, aho hakomeje gusabwa ibiganiro bishingiye ku kuri, kubahiriza amasezerano no kwirinda kubogama mu buhuza.