Kinyarwanda
English
Swahili
Abasirikare b’u Rwanda bari muri UNMISS bakomeje ibikorwa byo kwegera abaturage i Malakal
Abasirikare b’u Rwanda bari mu butumwa bw’Umuryango w’Abibumbye bwo kubungabunga amahoro muri Sudani y’Epfo (UNMISS), bakorera mu Ntara ya Upper Nile, bakoze ibikorwa byo gufatanya n’abaturage (civil-military cooperation) mu nkambi ya Malakal PoC, hagamijwe gukomeza umubano mwiza n’iterambere ry’imibereho y’abahatuye.
Iki gikorwa cyateguwe n’itsinda ryihariye ry’abagore mu gisirikare (Female Engagement Team), ryibanze ku kongerera icyizere n’ubumwe abaturage, by’umwihariko abagore n’abakobwa. Harimo gutegurwa umukino wa volleyball ugamije guteza imbere ubumwe, gusabana no kwiyumvanamo hagati y’abaturage n’abasirikare.
Byongeye kandi, abagize iri tsinda berekanye uburyo bworoshye bwo kwirwanaho (self-defence), bigisha abakobwa bato uburyo bwo kwirinda ihohoterwa rishingiye ku gitsina, banabahugura ku kwirinda malariya no gukoresha amazi meza mu buryo butekanye.
Abaturage bo mu nkambi ya Malakal PoC bashimiye abasirikare b’u Rwanda ku ruhare rwabo rugaragara mu kurinda umutekano no guteza imbere imibereho myiza y’abaturage, bavuga ko ibi bikorwa bibafasha kwiyumva hafi y’ingabo ziri mu butumwa bwo kubungabunga amahoro.
Ibi bikorwa bigaragaza umuhate w’u Rwanda mu gushyigikira amahoro arambye no guteza imbere imibereho y’abaturage mu bihugu bikiri mu bihe bikomeye by’umutekano, binyuze mu butumwa bwa UNMISS muri Sudani y’Epfo.
