Sosiyete Sivile ya Shabunda yatangaje ko imirwano yatangiye mu masaha ya kare ku cyumweru, ihuza ingabo za FARDC n’abo bafatanya bo mu mutwe wa Wazalendo, bahanganye n’ingabo za M23 zari zimaze iminsi zigaragaza ko zateye intambwe mu bice byo hagati mu ishyamba rya RD Congo. Imirwano yamaze amasaha make gusa mbere y’uko FARDC isubira inyuma, bituma M23 igerageza gukomeza kwagura uduce ifite mu maboko.

Ibinyamakuru byinshi muri RDC byagaragaje ko kwinjira kwa M23 muri Shabunda ari ikintu gifatwa nk’“igisumbye ibindi”, kuko iyi teritwari ifite agaciro kanini mu by’ubukungu no mu rwego rwa gisirikare. Ikinyamakuru Tazama RDC cyemeje ko Maimingi zombi ari zo duce twa mbere M23 ifashe muri Shabunda kuva intambara yongeye kubura.

Ku ruhande rwa politiki, Sumaili Miseka Emile, umudepite uhagarariye Shabunda, yasabye Leta gukora ibishoboka byose kugira ngo M23 ikurwe muri ibyo bice. Yavuze ko niba aba barwanyi bafashe inzira ibajyana ku birombe bya zahabu n’andi mabuye y’agaciro ari muri Shabunda, bizabaha ubushobozi n’imbaraga zo kurushaho kwagura intambara.

Ibi byose bibaye mu gihe mu masaha make mbere y’iyi mirwano, intumwa za Leta ya RD Congo n’iza AFC/M23 bari bamaze gusinya amasezerano y’imbanzirizamasezerano muri Qatar, arimo ingingo umunani zigamije gutegura amasezerano ya burundu y’amahoro. Ariko nk’uko byakunze kugenda ku masezerano menshi yabanjirije aya, umutekano wakomeje kuba ikibazo gikomeye, ndetse ingabo za Leta zikomeza kugaba ibitero by’indege z’intambara na drone mu bice bigenzurwa na M23. Ibi byakomeje gutuma abahanganye bakomeza guhigana bakurikirana aho undi aherereye, biviramo FARDC gucika intege mu duce tumwe na tumwe, nko muri Maimingi.

Kugeza ubu, abaturage bo muri Shabunda bakomeje guhunga, abandi baguma mu bwoba bw’uko imirwano ishobora gukomeza kwiyongera, mu gihe impande zombi zishinjanya gutuma amasezerano y’amahoro acikagurika mbere yo gushyirwa mu bikorwa.