Kinyarwanda
English
Swahili
Lt Col Simon Kabera yagaragaje isano iri hagati y’umutekano w’igihugu n’ubuzima rusange
Umuvugizi wungirije w’Ingabo z’u Rwanda (RDF), Lt Col Simon Kabera, yatanze ikiganiro ku bakozi ba Minisiteri y’Ubuzima n’ibigo biyishamikiyeho bagera ku 120, bari mu mwiherero ugamije kungurana ibitekerezo ku ruhare rw’inzego zitandukanye mu iterambere ry’igihugu.
Mu kiganiro cye, Lt Col Kabera yashimangiye isano ikomeye iri hagati y’umutekano w’igihugu, ubuzima rusange bw’abaturage n’ubushobozi bw’igihugu bwo kwiyubaka. Yagaragaje ko umutekano ari inkingi ya mwamba ituma serivisi z’ubuzima zitangwa neza, bityo abaturage bakagira imibereho myiza igira uruhare mu iterambere rirambye.
Uyu mwiherero w’iminsi itanu uri kubera mu Ishuri rya Gisirikare ry’u Rwanda i Gako, mu Karere ka Bugesera, watangiye tariki ya 15 Ukuboza 2025, ukazasoza tariki ya 19 Ukuboza 2025. Witabiriwe n’abakozi bo mu nzego zitandukanye z’ubuzima, baganira ku masomo y’amateka n’ibyibanze by’ejo hazaza hagamijwe kubaka igihugu gifite ubuzima bwiza kandi gihamye.
Ufite insanganyamatsiko igira iti “Kubaka igihugu gifite ubuzima bwiza kandi gihamye: Amasomo yavuye mu mateka, ibyibanze by’ejo hazaza,” uyu mwiherero ugamije kongerera abakozi b’inzego z’ubuzima ubumenyi ku ruhare rwabo mu kubungabunga imibereho myiza y’abaturage no gufasha igihugu kugera ku ntego z’iterambere.
Abawitabiriye bagaragaje ko ibiganiro nk’ibi bibafasha gusobanukirwa neza uko inzego z’umutekano n’iz’ubuzima zuzuzanya, bityo buri wese agatanga umusanzu we mu kubaka u Rwanda rutekanye, rufite abaturage bafite ubuzima bwiza.
