Kinyarwanda
English
Swahili
Huye: Abashoramari biteze gusarura agatubutse muri Siga Art Festival 2026
Ni ubwa mbere mu Rwanda hagiye kubera iserukiramuco ry’amateka rya Siga Art Festival, by’umwihariko rikabera mu karere ka Huye iminsi itatu, ibintu byakomeje kuvugisha benshi ndetse abashora imari muri ako karere bita amahirwe akomeye yo kwiteza imbere.
Ni igitaramo gikomeje kuvugisha benshi hirya no hino mu gihugu mbere y’uko kiba bitewe ahanini n’ingeri z'abahanzi, abanyarwenya, abakinnyi ba filime n’abandi bantu b’akomeye mu ruganda rw’imyidagaduro batandukanye bazakigaragaramo.
Iki gitaramo cyateguwe n’umusizi Junior Rumaga ku bufatanye na Karere ka Huye, kikaba kigamije kwigisha umuco, indangagaciro na kirazira abaturage binyuze mu myidagaduro itandukanye, kikaba kizabera mu karere ka Huye kuri Stade ya Kaminuza y’u Rwanda ishami rya Huye kuva tariki ya 19 Werurwe kugeza tariki ya 21 uyu mwaka.
Abashora imari bo muri ako karere babwiye UKWELITIMES ko icyo gitaramo ari umwanya mwiza wo kwiteza imbere kuri bo ndetse bakanagirana imikoranire ya hafi na bamwe mu bazaba bicyitabiriye. Uwitwa Nsabimana Jean Bosco, umucungamari w’imwe muri hotel zikorera muri ako karere, avuga ko kuba iryo serukiramuco rigiye kubera aho bakorera ari amahirwe akomeye bagomba kubyaza umusaruro.
Yagize ati “Ni amahirwe akomeye kuba ubuyobozi bwacu bugira uruhare mu gutegura igitaramo kinini nk’iki kigiye kuba, ikirenze kuri icyo, kikabera mu karere kacu ka Huye. Ni iby’agaciro gakomeye cyane ku bashora imari, tunashimira ubuyobozi bwacu kuko ni umwanya mwiza udufasha kwiteza imbere ndetse bikanadufasha kugirana imikoranire ya hafi n'abahanzi hagamijwe inyungu ku mpande zombi. Urebye ni umwanya mwiza twese tuba twifuza.”
Umuhanzi Christopher Muneza na mugenzi we Element, akaba na producer, bamwe mu bagomba kugaragara muri iri serukiramuco, mu kiganiro baherutse kugirana na Radio Salus ya Kaminuza y’u Rwanda, bateguje abakunzi babo impinduka zidasanzwe. Christopher avuga ko yari akumbuye gutaramira mu Ntara y’Amajyepfo, mu gihe Element yavuze ko we ari ubwa mbere agiye gutaramira abakunzi be bo mu Ntara bityo ko agomba kubibyaza umusaruro agashimisha abakunzi be bahatuye.
Uretse abo, iri serukiramuco kandi rizitabirwa n’abandi bahanzi baririmba injyana zigezweho na gakondo, abasizi, abanyarwenya n’abakinnyi ba filime. Ibyo benshi bakomeje kwandika bavuga ko ari uruganda rw’imyidagaduro rwose rugiye kuba rwimukiye i Huye.
Iri serukiramuco rya Siga Art Festival 2026 ryateguwe na SIGA RWANDA ku bufatanye na Karere ka Huye. Mu bazaryitabira harimo Rumaga Junior umusizi wa “Nariteguye”, Juno Kizigenza, Papa Cyangwe, Masamba Intore, Rider Man, Kevin Kade, Christopher, Diez Dola, Papa Sava, Bwiza, Rusine, Genz Comedy, Mani Martin, Alyn Sano, Titi Brown, Jule Sentore n’abandi.
