Ku wa 13 Ugushyingo 2025 Général de brigade Gaspard Baratuza,umuvugizi w'igisirikare cy'u Burundi yasobanuye ko ingabo zabo zagose Minembwe mu rwego rwo kurinda ko Uvira ihana imbibi n'imipaka ya RD Congo n'Uburundi biterwa na Twirwaneho, AFC/M23.

Mu cyumweru gishize ab'i Minembwe bakoze imyigaragambyo yamagana ingabo z'Abarundi zafunze amayira ahuza Uvira na Minembwe, bityo ibyo kurya, imiti n'ibindi nkenerwa mu buzima busanzwe byarahagaritswe ku buryo bakeneye ubutabazi. 

Inzira zafunzwe zirimo izihuza Minembwe na Mikarati, Point Zero n'ahandi. Général de brigade Gaspard Baratuza, yabwiye BBC Gahuzamiryango mu makuru yo mu ijoro ryo ku wa 13 Ugushyingo 2025 ko ingabo z'Abarundi ziri mu duce twa;Muramvya, Mugeti na Majembwe".

Yinyuzemo cyane

Général de brigade Gaspard Baratuza yabajijwe niba I Minembwe hariyo ingabo z'Abarundi abusanya n'ibyo yari yavuze. Ati"I Minembwe hari abanzi bacu, rero abaturage bitandukanye n'abanzi barebe ko badakora ingendo nk'ibisanzwe". 

Uku kwinyuramo kumvikanisha neza ko ingabo z'Abarundi zafunze imihanda yose ijya I Minembwe mu rwego rwo kwicisha inzara Abanyamulenge kandi ibi ni bimwe mu bigeze ibyaha by'intambara.

Uburundi buvuga ko bwohereje ingabo muri Kivu y'Amajyepfo mu kurinda umutekano w'imipaka y'igihugu kuko hari abarwanya ubutegetsi bari muri ariya mashyamba;Red Tabara na FNL-Nzabampema aho Uburundi buvuga ko iyo mitwe ikorana na Twirwanehona AFC/M23 mu gihe bo 'Iyo mitwe' ibihakana.

Ibi ntabwo Abanyamulenge babikozwa kuko basaba imiryango mpuzamahanga kwirukana ingabo z'Abarundi ntizivange mu bibazo bya RD Congo.

Ingabo z'Uburundi zifitanye amasezerano na RD Congo yo kurwanya umwanzi no kurinda imipaka. Zatsinzwe mu ntambara yazihuje na AFC/M23 ubwo hafatwaga Bukavu na Goma.