Ni umukino wabaye mu ijoro ryacyeye tariki 17 Gashyantare 2026, aho ikipe ya FC Barcelona yari itegetswe gutsinda Girona FC ariko ntibishobore biza kurangira ari yo itsinzwe n'iyi kipe yari iri ku mwanya wa 15 ku rutonde rw'agateganyo rwa Shampiyona.

Ku munota wa 48, ikipe ya FC Barcelona yaje guhusha Penalite yatewe nabi na Lamine Yamal ariko ku munota wa 59 Pau Cubarsi aza gutsinda igitego cya mbere ku mupira mwiza yahawe na Jules Kounde.

Ikipe ya FC Barcelona yakomeje kugenda ihusha ibitego bigiye bitandukanye ariko iza guhita ikosorwa na Girona FC ku munota wa 61, gitsinzwe na Thomas Lemar. 

Ntabwo Girona FC yoroheye cyane FC Barcelona wabonaga kwitwara neza muri uyu mukino biraza kuyigora cyane. Ku munota wa 86, yaje gutsinda igitego cya kabiri gitsinzwe na Fran Beltrán ku mupira mwiza yahawe na Joel Roca, umukino urangira FC Barcelona itakaje amanota atatu.

Ni umukino wakozeho FC Barcelona kuko yaje gukina ibizi neza ko Real Madrid yicaye ku mwanya wa mbere birangira iwugumyeho. FC Barcelona yicaye ku mwanya wa kabiri n'amanota 58 irushwa amanota abiri na Real Madrid, mu gihe Girona FC yahise ifata umwanya wa 12 n'amanota 29.