Kinyarwanda
English
Swahili
Centrafrique: Abapolisi b’u Rwanda bari mu butumwa bw'amahoro bambitswe imidali y’ishimwe
Ku wa Gatanu tariki ya 24 Mata, Umuryango w’Abibumbye wambitse imidari abapolisi b’u Rwanda bari mu butumwa muri Repubulika ya Centrafrique (MINUSCA), yo kubashimira umuhate n’ubwitange byabaranze mu gihe cy’amezi 11 bamaze mu kazi ko gucungira umutekano abaturage b’abasivili muri icyo gihugu.
RWAPSU I-10 n’abandi bapolisi b’u Rwanda badakorera mu matsinda, bose hamwe bagera kuri 315 harimo abapolisikazi 65.
Uyu muhango wayobowe n’Intumwa yihariye y’Umunyamabanga mukuru w’Umuryango w’Abibumbye muri Santrafurika; Valentine Rugwabiza wari umushyitsi mukuru, witabirwa n’abandi banyacyubahiro barimo; Ambasaderi w’u Rwanda muri Santrafurika, Olivier Kayumba, Commissioner General Amir Arfaoui, ushinzwe ibikorwa by’ishami rya Polisi y’umuryango w’Abibumbye (UNPOL) n’abandi bakozi b’uwo muryango mu gihugu.
Mu butumwa yatangiye muri uyu muhango, Madamu Rugwabiza yashimiye abapolisi b’u Rwanda ku butwari n’ubwitange bagaragaza mu kazi kabo ka buri munsi ko gucungira umutekano abaturage ba Santrafurika.
Yagize ati: “Umuryango w’Abibumbye ubashimira ubushake, umuhate n’ubwitange bibaranga mu kuzuza inshingano zanyu. Akazi mukora ko gucungira umutekano abaturage n’ibindi bikorwa biteza imbere imibereho myiza yabo, bituma intego z’Umuryango w’Abibumbye muri iki gihugu zigerwaho vuba kandi neza bityo imidali y’ishimwe mwambitswe uyu munsi ni ikimenyetso cy’uko tuzirikana uburyo mwitanga mutizigamye, mutitaye ku mbogamizi muhura na zo.”
Assistant Commissioner of Police (ACP) Bernardin Nsengiyumva uyobora itsinda RWAPSU I-11, yavuze ko bafite inshingano zitandukanye zirimo kurinda abayobozi bakuru muri Guverinoma ya Santrafurika, guherekeza abakozi ba MINUSCA, abacamanza bo mu gihugu n’abo ku rwego mpuzamahanga bakora mu rukiko Mpanabyaha rwihariye muri Santrafurika, bagakora n’ibindi bikorwa byo guherekeza amatsinda y’intumwa zisura igihugu ndetse n’ibindi bikorwa biteza imbere imibereho myiza y’abaturage ku bufatanye n’izindi nzego z’umutekano z’imbere mu gihugu.
ACP Nsengiyumva yashimiye MINUSCA, inzego z’umutekano z’imbere mu gihugu n’abaturage ba Santrafurika ku bufatanye bwagutse babagaragariza butuma babasha kuzuza neza inshingano zabo kandi bikabafasha gusangizanya ubunararibonye kandi byose bigakorwa mu bwubahane n’ubunyamwuga.
U Rwanda rwatangiye kohereza abapolisi mu butumwa bw’amahoro muri Repubulika ya Centrafrique kuva mu mwaka wa 2014, ahabarizwa abapolisi bagera kuri 560 bagize amatsinda ane akorera mu bice bitandukanye by’igihugu.
Amatsinda abiri; RWAFPU I na RWAPSU yambitswe imidali uyu munsi; akorera mu murwa mukuru Bangui, ahitwa Kaga Bandoro mu majyaruguru y’igihugu hagakorera itsinda RWAFPU II, mu gihe itsinda RWAFPU III rikorera mu mujyi wa Bangassou uherereye mu Burasirazuba bw’amajyepfo y’igihugu.
