Kinyarwanda
English
Swahili
Amb. Jean de Dieu Uwihanganye yatanze impapuro zo guhagararira u Rwanda muri Brunei
Kuri uyu wa gatandatu taliki 17 Gicurasi 2025 Ambasaderi Jean de Dieu Uwihanganye yashyikirije Umwami wa Brunei Darussalam, Haji Hassanal Bolkiah Mu’izzaddin Waddaulah, impapuro zimwemerera guhagarira u Rwanda muri icyo gihugu.
Ubusanzwe Brunei Darussalam ni igihugu giherereye mu Majyepfo y’Iburasirazuba bw’Umugabane wa Aziya mu Majyaruguru y’inkengero z’ikirwa cya Borneo, kikaba gisanzwe gifitanye umubano n’u Rwanda.
Ni umubano washinze imizi mu 2020, wemejwe binyuze mu guhana impapuro zemeza imibanire mu bya dipolomasi hagati y’ibihugu byombi.
Muri Kamena 2021 ba Minisitiri b’Ububanyi n’Amahanga ku mpande zombi bagiranye ibiganiro bahuriye mu nama y’Ibihugu bikomeye ku Isi (G20) byibanze ku kongera imikoranire.
Muri Kamena 2024, Nyiricyubahiro Sultan Haji Hassanal Bolkiah Mu’izzaddin Waddaulah, yasuye u Rwanda agirana ibiganiro na Perezida Paul Kagame byibanze ku kwagura ubutwererane mu nzego zitandukanye.
Gukomeza kwimakaza ubufatanye mu bya dipolomasi, kubyaza umusaruro amahirwe ari mu mikoranire mu bukungu, uburezi, ubuzima n’iterambere rusange ni bimwe mu bikomeza gutsura umubano hagati y’ibihugu byombi .
