Ibi byatangajwe kuri uyu wa gatandatu tariki ya 4 Mata 2026 muri Raporo nshya yashyizwe hanze n'Ikigo cy’Igihugu gishinzwe Iteganyagihe muri Kenya, KMD, igaragaza ko mu bice bigikomeje kugwamo imvura nyinshi bishobora kugarizwa n’icyorezo gishya gifitanye isano n'indwara ya Malaria.

Iyi Raporo igaragaza ko muri uku kwezi kwa Mata uyu mwaka gukunze kugwamo imvura nyinshi mu bice by'uburengerazuba bwa Kenya mu ntara ya Kisii hari ibyago byinshi by'uko abahatuye bakandura icyo cyorezo 100% bitewe n’imiterere yaho.

Izindi ntara zagaragajwe muri iyi Raporo nazo zishobora kuzandura icyo cyorezo ni Nandi, yagaragajwe ko 60% by’abahatuye nabo bashobora kuzayandura, mu gihe iya Kakamega abayituyemo nabo bafite ibyago biri ku 27.3% byo kwandura icyo cyorezo.

KMD ivuga ko igishobora gutuma Malaria yiyongera muri Kenya, ikarenga indwara isanzwe, ahubwo ikaba icyorezo ari uko hakomeje kugwa imvura nyinshi, yiyongera ku miterere yaho, bigatera imibu yororoka vuba cyane.

Mu rwego rwo kwirinda ko iki cyorezo cyakiyongera kikaba cyateza icyorezo, nk'uko bikekwa, Leta ya Kenya yasabye abaturage bayo, by'umwihariko abatuye mu turere dufite ibyago byinshi, gufata ingamba zirimo gutema ibihuru, gusiba ibidendezi by'amazi, gukoresha inzitiramibu zikoranye umuti wica imibu no kwihutira kujya kwa muganga igihe cyose bagaragaje ibimenyetso bya Malariya.

Muri Raporo iheruka y'Ishami ry’Umuryango w’Abibumbye ryita ku Buzima ku Isi WHO/OMS, ivuga ko mu mwaka wa 2024-2025 habaruwe abantu barenga miliyoni 282 banduye Malariya, mu gihe abagera ku 610,000 bahitanywe nayo. Kenya yonyine yabaruwemo abarenga miliyoni eshanu, ibintu byateye benshi ubwoba.