Kinyarwanda
English
Swahili
Uganda: Bobi Wine yasabye abamushyigikiye kwigaragambya bamagana ibyavuye mu matora
Umukuru w’abatavuga rumwe n’ubutegetsi muri Uganda, Bobi Wine, yatangaje ko atazajuririra mu nkiko ibyavuye mu matora y’umukuru w’igihugu yabaye ku wa kane tariki 15 Mutarama 2026, avuga ko adafite icyizere mu bucamanza bwo muri icyo gihugu. Ibi yabibwiye BBC, aho yasabye abamushyigikiye kujya mu mihanda kwigaragambya mu mahoro mu rwego rwo kurengera demokarasi.
Bobi Wine, wavuganye na BBC ari mu bwihisho kubera impungenge z’umutekano we, yavuze ko azakomeza guhangana na Perezida Yoweri Museveni n’ubwo hari igitutu n’iterabwoba avuga ko akomeje guhura nabyo.
Yagize ati: “Ubucamanza muri Uganda bwafashweho ingwate, kandi turashishikariza Abanya-Uganda gukoresha uburyo bwose bwemewe n’amategeko mu kurwanira no kurinda demokarasi yabo.”
Mu matora aheruka, Perezida Yoweri Museveni w’imyaka 81 yatangajwe nk’uwatsinze ku bwiganze bw’amajwi 71%, mu gihe Bobi Wine, umukandida wamukurikiye hafi kurusha abandi, yabonye amajwi 24%. Museveni yashinje abatavuga rumwe n’ubutegetsi kugerageza gutesha agaciro ibyavuye mu matora binyuze mu bikorwa by’urugomo, abita “iterabwoba”.
Ku rundi ruhande, Bobi Wine, amazina ye nyakuri akaba ari Robert Kyagulanyi, yemeje ko ibyavuye mu matora ari “ibihimbano”, avuga ko bitagaragaza ubushake nyabwo bw’abaturage. Yongeye kunenga inzego z’umutekano, azishinja kuba zararenze ku nshingano zazo zinjira mu rugo rwe, zigafungiramo umugore we n’abandi bo mu muryango.
Yavuze kandi ko ku wa gatanu nijoro yahungiye mu nkengero z’umurwa mukuru Kampala, nyuma y’uko inzego z’umutekano zagabye igitero iwe. Bobi Wine avuga ko n’ubwo ahura n’izi mbogamizi zose, atazigera areka guharanira impinduka n’imiyoborere ishingiye kuri demokarasi muri Uganda.
