Ibi byabaye mu gihe ubutegetsi bwa Perezida Trump buri gushyira imbaraga mu gukaza amategeko ajyanye n’abinjira n’abasohoka, ndetse no gukaza umutekano ku mipaka.

Amerika iritegura kwakira Igikombe cy’Isi cya Ruhago mu 2026, ndetse n’Imikino Olempike izabera i Los Angeles mu 2028.

Sénégal iri mu bihugu 36 Leta Zunze Ubumwe za Amerika ishobora kongera ku rutonde rw’ibihugu bizashyirirwaho ingamba zo kubuzwa kwinjira ku butaka bwayo, nk’uko bigaragara mu ibaruwa y'ubutegetsi bwa Amerika.

Minisitiri w’Intebe wa Sénégal, Ousmane Sonko, binyuze kuri Facebook yanditse ko yamenyeshejwe ko visa kuri aba bakinnyi b'ikipe y’igihugu y’abagore ya basketball ya Sénégal, zitagitanzwe.

Yavuze ko yahaye amabwiriza Minisitiri wa Siporo ko yahagarika umwiherero w’imyitozo wari uteganyijwe kumara iminsi 10 ubera muri Leta Zunze Ubumwe za Amerika.

Nk’uko bitangazwa na Babacar Ndiaye, perezida w’ishyirahamwe ry'umukino wa Basketball muri Sénégal, Leta ya Amerika yemeye gusa kongerera visa abari bazisanganwe, ariko ivuga ko abari bazisabye bwa mbere ntazo babona.

Minisitiri w’Intebe wa Sénégal, Ousmane Sonko ni we watangaje ko USA yimpe viza abakinnyi b'ikipe y'igihugu cye 

Iyi kipe y'igihugu ya Sénégal itazirwa 'Les Lionnes' bari biteguye kujya mu myitozo muri Amerika mbere y’uko batangira irushanwa rya AfroBasket 2025 rizabera muri Côte d’Ivoire mu kwezi kwa Nyakanga.

Umuvugizi wa Minisiteri y’Ububanyi n’Amahanga ya Leta Zunze Ubumwe za Amerika yabwiye AFP ko batemerewe kugira icyo batangaza ku birebana n’abantu ku giti cyabo, naho Ambasade ya Amerika muri Sénégal nayo ntiyigeze isubiza ubwo yabazwaga kuri ibi.

Nyuma y'ibi, Minisitiri w’Intebe Sonko yashimiye igihugu cy’u Bushinwa kubwo gufasha abakinnyi ndetse n'abatoza benshi bo muri Sénégal, mu kubahugura.