Uyu muhango w’irahira wabereye mu murwa mukuru Antananarivo, aho Randrianirina yatangaje ko azashyira imbere "gusubiza ubusugire bw’igihugu no kugarura ituze mu baturage", nyuma y’uko bivugwa ko hari imvururu zishingiye ku miyoborere n’ubukungu bwifashe nabi.

Perezida wahozeho, Andry Rajoelina, yagiye ku butegetsi bwa mbere mu 2009, ahiritse na we uwari Perezida icyo gihe, mbere yo gutorerwa manda ebyiri zikurikirana. Abasesenguzi bavuga ko imiyoborere ye yagiye inengwa cyane mu myaka ya vuba, by’umwihariko ku bijyanye n'ubwisanzure bwa politiki n’izamuka ry’ibiciro.

Nubwo hari abatavuga rumwe na Colonel Randrianirina, benshi mu baturage bagaragaje ko bashyigikiye impinduka, bavuga ko bazirikana icyerekezo gishya cy’ubuyobozi gishingiye ku kurwanya ruswa no kugarura icyizere mu nzego za leta.

Nta makuru arambuye aratangazwa ku buryo ihirikwa ry’ubutegetsi ryagenze, ariko abamwunganira bavuga ko ryakozwe mu buryo "bwo kurengera inyungu rusange z’igihugu."

Ihuriro ry'ibihugu bya Afurika n’imiryango mpuzamahanga birimo gukurikirana iby’iyi mpinduka, ndetse haritezwe ko rizagira icyo ritangaza mu masaha ari imbere.