Ibi aba bakinnyi babigezeho ku cyumweru tariki 26 Ukwakira 2025, nyuma yaho ikipe barimo zitwaye neza. Mugisha Bonheur akina muri Al Masry yo mu Misiri naho Buregeye Prince akina muri Nairobi United yo muri Kenya.

Ku cyumweru, nibwo ikipe ya Al Masry ikinamo Mugisha Bonheur yasezereye Al Ittihad yo muri Libya iyitsinze ibitego 2-1. Umukino ubanza wari wahuje aya makipe yombi warangiye ikipe zinganyije 0-0 bivuze ko Al Masry ibyayo yabikoreye mu rugo.

Kuri uyu munsi kandi nibwo ikipe ya Buregeye Prince, Nairobi United yakinnye na Etoile Sportive du Sahel urangira Etoile Sportive du Sahel itsinze ibitego 2-0 mu mukino wabereye muri Tunisia. Ikipe zombi zanganyije ibitego 2-2 mu mukino ubanza n'uwo kwishyura ariko bateye Penalite, Nairobi United ihite ibona itike yo gukomeza mu mikino y'Amatsinda nyuma yo gutsinda Penalite 7-6.

Muri uyu mukino wahuje Al Masry na Al Ittihad, umukinnyi ukina hagati mu kibuga, Mugisha Bonheur, yabanjemo ndetse aranawurangiza. Ni umusore umaze igihe yitwara neza kuva muri Stade Tunisien yavuyemo yerekeza muri Al Masry. Ku rundi ruhande ntabwo Prince Buregeye yigeze abona umwanya wo gukina ariko yari ku ntebe y'abasimbura.

Ikipe ya Kaizer Chiefs nayo ikinamo Ntwari Fiacre yatsinze ikipe yitwa AS Simba ibitego 3-1. Ni umukino watumye Kaizer Chiefs nayo igera muri CAF Confederations Cup nyuma yo gutsinda imikino ibiri ibitego 3-1. Muri uyu mukino Ntwari Fiacre yari ku ntebe y'abasimbura nubwo atahawe umwanya.

Mugisha Bonheur yanyuze muri APR FC aho yayijemo muri 2021 avuye muri Mukura Victory Sports ndetse aza kwerekeza muri Stade Tunisien yo muri Tunisia. Buregeye Prince yakurikiye muri APR FC, yerekeza muri AS Kigali ari ho yavuye yerekeza muri Kenya. Ntwari Fiacre nawe yanyuze muri APR FC, akina muri AS Kigali, TS Galaxy ariho yavuye yerekeza muri Kaizer Chiefs.

Mugisha Bonheur yageze mu Matsinda na Al Masry 

Buregeye Prince yageze mu matsinda na Nairobi United