Ku wa 29 Ukuboza 2025 Urukiko rwisumbuye rwa Nyarugenge rwaburanishije ubujurire bwatanzwe n'abari muri dosiye yo gusakaza amashusho y'umuhanzi Yampano. 

Ku isaha ya 9:58 nibwo Urukiko rwisumbuye rwa Nyarugenge rwahamagaye ababuranyi. Bahereye kuri Djihad n'abamwunganira. Inteko iburanisha igeze kuri Kalisa John alias Kjohn, babajije niba Ubushinjacyaha bwaramujuririye, barahakana.

Urukiko rwamubwiye kujya kwicara hasigara bane barimo; Uzabakiriho Cyprien alias Djihad, Kwizera Nestor alias Pappy Nesta, Ishimwe Patrick alias Pazzo Man na Ishimwe François Xavier. 

10:01 Urukiko rwavuze ku miterere y'icyaha

Urukiko rwavuze ko Uzabakiriho Cyprien alias Djihad yigeze gushyira amashusho y'urukozasoni kuri WhatsApp status.

Urukiko rwavuze ko ibyagezweho bihagije kuko yasakaje amashusho akoresheje urusobe rwa mudasobwa. Urukiko rw'ibanze rwa Kicukiro rwashingiye kuri ayo mashusho noneho rumusabira gufungwa iminsi 30 y'agateganyo.

10:02 Djihad yireguye

Djihad yireguye avuga ko yakoze ikiganiro avugamo umupuri'igitsina gore' muri icyo kiganiro Djihad yakoze yasabaga abantu kudasakaza amashusho. Yahakanye ko atigeze asakaza amashusho y'urukozasoni ya Yampano.

Yanavuze ko atanyuzwe n'imikirize y'urubanza ariyo mpamvu asaba ko yafungurwa by'agateganyo. 

10:05 Maitre Fatikaramu Jean Pierre 

Uyu wunganira Djihad yavuze ibyo abona nk'inenge. Impamvu ya mbere yavuze ku mashusho yashyize kuri WhatsApp status, indi yavuze ijambo umupuri. Yavuze ko Ubushinjacyaha butafashe amashusho yasakajwe kuri WhatsApp status ari 'Screen shot ' ni ifoto irimo urutoki rw'umugore wa Yampano. 

Yavuze ko muri iyo foto nta hantu Yampano agaragara. Maitre Fatikaramu Jean Pierre yavuze ko iyo 'screen shot 'nta cyemeza ko ari Djihad wayisakaje kuko nta nimero ze ziriho.

Yavuze ko ayo mashusho yafashwe saa sita z'ijoro. Ati"Ibyo byose ni ibyahimbwe'. Yabwiye urukiko ko uwafashe 'screen shot 'yari no gufata amashusho.

Yavuze ko urukiko rwaguye mu mutego n'ubushinjacyaha. Ati"Urukiko rwavuze ko ibyavuzwe n'ubushinjacyaha ari ukuri nyamara Ubushinjacyaha nabwo ni ababuranyi".

Yavuze ko Ubushinjacyaha bwananiwe kwerekana ayo mashusho y'urukozasoni bityo nta mpamvu yo kugenekereza. Ku ijambo umupuri, yasobanuye ko iryo jambo kurivuga bitagize icyaha. Yavuze ko ikiganiro yakoze yari agamije kwigisha abantu kudakora ibibi.

10:15 Maitre Bayisabe Irene

Yabwiye urukiko ko ikiri muri dosiye ari amashusho y'urukozasoni ya Yampano ari gukora imibonano mpuzabitsina n'umugore we. Yavuze ko nta hantu urukiko rwigeze ruvuga ko Djihad yerekanye ayo mashusho. Bavuga ko muri dosiye uwitwa Odette yeretse uwitwa Semuhungu Eric.

Semuhungu Eric yagiye kubwira Yampano ko yabonye amashusho ye abikuye kwa Odette nawe wabikuye kwa Djihad (WhatsApp Status). Yavuze ko Djihad atigeze asakaza amashusho y'urukozasoni ya Yampano. 

Odette yari yicaranye na Semuhungu Eric, noneho Semuhungu Eric areba muri telefoni ya Odette asangamo ko arebye kuri WhatsApp status abona ko Djihad ari gusakaza amashusho y'urukozasoni ya Yampano. 

Semuhungu Eric yabwiye Yampano ko Djihad ari gukwirakwiza amashusho y'urukozasoni ye. Yavuze ko Djihad na Semuhungu Eric bari bafitanye ibibazo ndetse na nyuma y'uko Djihad afunzwe Semuhungu Eric yakoze ibiganiro byo kwishongora.

Ku kiganiro Djihad yakoze , Maitre Bayisabe Irene yavuze ko yakoze amakuru kuri ayo mashusho bityo asaba abantu kutayasakaza. Yavuze ko urukiko rw'ibanze rwa Kicukiro rwagendeye ku mpamvu zidafatika. 

Yasabye urukiko rw'isumbuye rwa Nyarugenge kuzasesengura mu bushishozi rurekure umukiriya we. Mu gusoza yavuze ko raporo ya Cyber itigeze yerekana ko Djihad yasakaje amashusho y'urukozasoni ya Yampano. Yavuze ko abanyamategeko bemeye kwishingira Djihad kandi ko yashyizemo ibyangombwa muri sisiteme. 

Mu ngingo ya 81 kugeza ku ya 83 harimo ko uregwa ashobora kwishingirwa. Yasobanuye ko Djihad adashobora gutoroka ubutebera. Yasabye ko yakurikiranwa adafunze.

10:28 Ishimwe François Xavier 

Urukiko rwavuze ko Urukiko rw'ibanze rwa Kicukiro rwari rwashingiye ku kuba telefoni yarakoreshejwe mu gukwirakwiza amashusho y’urukozasoni ya Yampano.

  Ikindi urukiko rwashingiye kuri raporo ya Cyber crime, yerekana ko telefoni yakoreshejwe. Urukiko rwabonye ko ibyo bibiri (2) byari bihagije bityo afungwa iminsi 30 y'agateganyo.

Ishimwe François Xavier nta mwunganizi afite. Yiburaniye avuga ko asaba ko bazareba abo yahaye amashusho bakababaza niba koko ari we wayamuhaye.

Yavuze ko uwahawe amashusho akwiriye kugaragara. Ishimwe Francois Xavier usa n'utazi uko yiregura yavuze ko atazi uwasakaje amashusho.  

Urukiko rwamuciye mu ijambo rumubwira ko impamvu zifatika zagezweho zerekana ko telefoni ye yakoreshejwe isakaza amashusho y'urukozasoni ya Yampano.

Yavuze ko aho atuye harazwi, kandi igihe cyose yaba akenewe yakwitaba. Yasabye urukiko kumufungura by'agateganyo. 

10:34 Ishimwe Patrick alias Pazzo Man 

Yibukijwe ko Urukiko rw'ibanze rwa Kicukiro rwashingiye kuri raporo ya Cyber yerekanye ko Ishimwe Patrick yavuganye na Semitego Muzafaru. Iyo raporo ivuga ko Pazzo Man yasabye Muzafaru gusiba ayo mashusho kuko inzego z'ubutabera ziri kumushakisha.

 Iyo raporo ishimangira ko Pazzo Man yari yahaye Muzafaru ayo mashusho.

 Indi mpamvu ikomeye ni uko Pazzo Man yemeye ko yari afite amashusho y'urukozasoni ya Yampano kandi ko yari afite umubare banga 'Password ' ya email ya Yampano yari iriho amashusho y'urukozasoni. 

Pazzo Man yabwiye urukiko ko amashusho yoherereje Semitego Muzafaru ari ayo yifashe asa n'uwishinganisha.

Yahishuye ko atari amashusho y'urukozasoni ya Yampano yamuhaye. Pazzo Man yavuze ko yari 'manager' wa Yampano. Yasobanuye ko hari n'abandi bari bafite ububasha'Access' kuri email ya Yampano. 

Pazzo Man yafashe amashusho avuga ko agiye kwitanga kuri RIB ya Rwezamenyo noneho ayoherereza Semitego Muzafaru. Pazzo Man yavuze ko Urukiko rwasesenguye nabi ayo mashusho. 

Urukiko rwavuze ko muri raporo ya Cyber yasabye Semitego Muzafaru yamenyeshaga abantu ko agiye kwitaba. Urukiko rwamwibukije ko raporo ya Cyber ihamya ko Pazzo Man yasabye Muzafaru Semitego gusiba amashusho y'urukozasoni ya Yampano. 

Hano habayeho impaka noneho Pazzo Man avuga ko urukiko rw'ibanze rwa Kicukiro rwibeshye. Kwisobanura byamunaniye hiyambazwa umwunganira. 

10:43 Maitre Nsanzineza Emmanuel 

Uwunganira Pazzo Man yahawe umwanya asobanura ibyananiye Pazzo Man kuko yarimo avanga imvugo ku buryo byari byatangiye kugora inteko iburanisha gusobanukirwa uko yiregura.

Yasobanuye ibyagezweho na raporo ya Cyber. Yavuze ko iyo raporo ivuga ko 'habonetse ibiganiro hagati ya Pazzo Man na Semitego Muzafaru alias Ddumba aho habonetse amashusho amubwira ko RIB iri kumushakisha".

Maitre Nsanzineza Emmanuel yavuze ko urukiko rwamubeshyeye kuko nta mashusho y'urukozasoni yahaye Semitego Muzafaru alias Ddumba. Yavuze ko umukiriya we afunze kubera ikibazo cy'icyongereza kuko Ubushinjacyaha bwasemuye nabi iyo raporo. Yasabye ko umukiriya we akwiriye gufungurwa by'agateganyo. 

Uwunganira Pazzo Man yavuze ko RIB yafashe telefoni ze basanga nta mashusho yigeze asakaza. Yavuze ko ihame ari uko uwo yunganira akwiriye gukurikiranwa adafunze. Ikindi raporo ya Cyber yerekanye ko atigeze asakaza.

Yasabye urukiko rw'isumbuye rwa Nyarugenge gukosora amakosa yakozwe n'urukiko rw'ibanze rwa Kicukiro. 

10:53 Kwizera Nestor alias Pappy Nesta 

Urukiko rwabanje kumwibutsa icyo urukiko rw'ibanze rwa Kicukiro rwashingiyeho. Hashingiwe ku mpamvu zifatika zirimo kuba yarasabye ko yakohererezwa ayo mashusho y'urukozasoni akaba yari afite umugambi wo kuyoherereza abandi.

 Indi mpamvu yashingiweho iri mu gika cya 14 aho Kwizera Nestor yasabye amashusho noneho ayoherereza abandi. Urukiko rwasanze ibyagezweho mu iperereza bihagije ku cyaha cyo gusakaza amashusho y'imikoreshereze y'ibitsina.

Kwizera Nestor yabwiye urukiko ko amashusho ya Yampano yageze hanze ku wa 03 Kamena 2025 nyamara we yayabonye mu Ukwakira 2025. Yavuze ko yayisabye agamije kumenya ibiri kuvugwa ku mbuga nkoranyambaga.

Yavuze ko hari uwamwandikiye arayimusaba ariwe Kalisa John alias Kjohn. Yasabye ko yafungurwa by'agateganyo kuko adateze gutoroka ubutebera. 

Maitre Turahirwa Theogene yunganiye umukiriya we. Yagaragaje ko umucamanza yabifashe uko bitari. Yavuze ko icyaha ashinjwa nta cyo yakoze. Kuba yarahaye ayo mashusho Kalisa John asanga nta cyaha bigize.

Yavuze ko uwo yunganira afungiye I Mageragere nyamara uwifashe amashusho akanagira uruhare mu kuyasakaza ari kwidegembya. Yasabye urukiko ko uwo yunganira akwiriye gufungurwa by'agateganyo agakurikiranwa ari hanze.

Yasabye ko yakabaye ategekwa ibyo yubahiriza. Yavuze ko muri sisiteme bashyizemo icyemezo cy'uko ari inyangamugayo ku buryo urukiko rubyemeye rwamurekura kuko igihe cyose ubutabera bwamukenerera yaboneka.

11:08 Abajuriye basoje kwiregura,ijambo rihabwa Ubushinjacyaha 

Ubushinjacyaha bwavuze ko icyemezo cy'urukiko rw'ibanze rwa Kicukiro nta nenge kuko ibyagezweho bihagije. Uhagarariye Ubushinjacyaha muri iyi dosiye, yavuze ko iperereza ryageze ku bimenyetso bihagije bituma bakekwaho icyaha. 

Yagarutse kuri Djihad avuga ko yasakaje 'Screen shot ' y'amashusho y'urukozasoni. Yasabye urukiko kuzashishoza neza kuko ibiri muri Screen shot nibyo bigize amashusho y'urukozasoni ya Yampano. 

Nyuma yo gusakaza Screen shot yagiye gukora ikiganiro avuga ko imipuri ya Nyarugenge ijagaraye kandi ko yazanyemo izina rya Yampano. Yavuze ko hari uruhare rwo gusakaza amashusho y'urukozasoni ya Yampano. 

Yagarutse kuri raporo ya Cyber ihamya ko Djihad yasakaje amashusho y'urukozasoni ya Yampano. Ubushinjacyaha bwasabye ko Djihad akomeza gufungwa by'agateganyo kugirango atabangamira iperereza.

Urukiko rwabajije Ubushinjacyaha kuri telefoni yasakaje screen shot atari iya Djihad. Umushinjacyaha yavuze ko hari abatangabuhamya babajijwe, barimo Semuhungu Eric. 

Kuri Ishimwe François Xavier, Umushinjacyaha yavuze ko telefoni ye yasakaje amashusho kandi ko yanayagurishaga.

Kuri Ishimwe Patrick alias Pazzo Man, Umushinjacyaha yavuze ko uwatanze ikirego yavuze ko Yampano yavuze ko Pazzo Man ari we wageraga kuri ayo mashusho. Kuba rero Pazzo Man yarageraga kuri email bihagije.

Yagarutse kuri raporo ya Cyber, aho Ishimwe Patrick alias Pazzo Man yifashe amashusho abwira Semitego Muzafaru alias Ddumba atanga abagabo ahakana ko atakwirakwije amashusho y'urukozasoni ya Yampano. 

Umushinjacyaha yavuze ko impamvu zagezweho zihagije. Urukiko rwabajije Ubushinjacyaha ku bantu benshi bari bafite ububasha kuri email ya Yampano. Umushinjacyaha yavuze ko Yampano yavuze ko Ishimwe Patrick alias Pazzo Man ari we wenyine wari ushinzwe email ye bityo ibyavuzwe na Pazzo Man nta shingiro bifite.

Kuri Kwizera Nestor alias Pappy Nesta Umushinjacyaha yavuze ko ari mu bakwirakwije bityo iyo mpamvu ikaba ikomeye kugirango akurikiranyweho icyaha afunzwe. Ubushinjacyaha bwasobanuye ko bakurikiranwe bari hanze babangamira iperereza kuko ari ibyaha bikorerwa kuri murandasi. Yasoje asaba ko Urukiko rwisumbuye rwa Nyarugenge ruzakoresha ubushishozi ku mwanzuro uzafatwa.

11:27

Abunganira Djiha bateye urutoki hejuru basaba ijambo ariko urukiko rwabahakaniye ahubwo ruha umwanya buri muburanyi kuvuga ijambo rya nyuma. Djihad yasabye urukiko kuzamurekura no gusuzuma uwo mu 'Djihad'uvugwa wasakaje WhatsApp status. 

Maitre Bayisabe Irene yasabye urukiko ko uwitwa Odette uwo yavuze niba yaba ari Djihad uri imbere y'inteko. Urukiko rwabujije Maitre Bayisabe Irene kutagaruka mu rubanza. Maitre Fatikaramu Jean Pierre yabwiye urukiko ko uwo yunganira atazatoroka ubutebera.

Ishimwe François Xavier yavuze ko ntacyo yongeraho. Urubanza rwakomereje kuri Ishimwe Patrick alias Pazzo Man, yasabye ko yizeye ubutabera bityo asaba urukiko kurekurwa. Nta mpamvu n'imwe zihari zerekana ko yatoroka ubutebera.

Kuri Kwizera Nestor yabwiye inteko iburanisha ko asaba kurekurwa akaburana ari hanze. Yavuze ko afite aho atuye hazwi, aho akora hazwi. Nta mpamvu afite yatuma ananiza Ubushinjacyaha kandi afite umwishingizi ari we nyina.

11:40 Urubanza rwapfundikiwe urukiko ruvuga ko umwanzuro w'urubanza uzasomwa ku wa 05 Mutarama 2026 saa kumi.