Uyu muhanga mu kuvanga imiziki akurikiranyweho ibyaha bine (4);Icyaha cyo gukoresha ibiyobyabwenge cyangwa se urusobe ry'ibiyobyabwenge, icyaha cyo guhunga umaze guteza cyangwa se gukora impanuka, kwanga ko bagusuzumisha ibyuma bipima ko wanyoye ibisindisha, n'icyaha cy'ubwicanyi budaturutse ku bushake. Muri ibi byaha yemeyemo bibiri ahakana bibiri.

Uko byari bimeze mbere y'iburana

Urubanza rwabereye mu Urukiko rw'ibanze rwa Nyarugenge, ruri mu karere ka Nyarugenge ruguru gato ya Kiriziya yitiriwe mutagatifu Karoli Rwanga.

Icyumba cyabereyemo urubanza gifite nimero rimwe (1). Ku muryango winjira mu cyumba cy'iburanisha hari abapolisi babiri (2)b'inyenyeri zitari mu nsi y'eshatu n'undi udafite ipeti wari ufite imbunda bigaragara ko acunze neza umutekano.

Abaje kumva urubanza bicaye ku ntebe batuje, Perezida w’Inteko iburanisha abibutsa gukuramo ingofero, kurangwa n'ituze.

Ku ruhande rw'abanyamakuru n'abakora ku mbuga nkoranyambaga by'umwihariko YouTube, bibukijwe ko gufata amajwi n'amashusho bibujijwe, icyakora babwira ko kwandika byemewe.

Perezida w'inteko iburanisha yibukije ababuranyi uko bari 13 ikigenderewe. Ati'Muraburana ifungwa n'ifungurwa ry'agateganyo.  

Ntabwo ari urubanza mu mizi. Ubushinjacyaha buragaragaza impamvu zikomeye zituma musabirwa gufungwa iminsi 30 y'agateganyo n'ibyagezweho by'ibanze.

Mwebwe rero muragaragaza impamvu musaba ko mufungurwa by'agateganyo. Ntimuburane mu mizi".

Kera kabaye abunganira DJ Toxxyk bahageze noneho baramwegera. Ni abanyamategeko babiri barimo uw'umugabo n'umugore.

9:38 DJ Toxxyk n'abamwunganira bagiye imbere kuburana.

DJ Toxxyk yavuze ko yemera ibyaha bibiri (2);icyaha cy'ubwicanyi budaturutse ku bushake n'icyaha cyo guhungaumazegutezacyangwasegukoraimpanuka. Yahakanye icyaha cyo kwanga ko bagusuzumisha ibyuma bipima ko wanyoye ibisindisha n'icyaha cyo gukoresha ibiyobyabwenge cyangwa se urusobe rw’imiti ikoreshwa n'ibiyobyabwenge.

Ubushinjacyaha bwavuze ko ku wa 20 Ukuboza 2025 DJ Toxxyk yagongeye umupolisi kuri peyaje. Uwo mupolisi yari agiye kumuyobora ngo anyure mu gisate cyabugenewe.

DJ Toxxyk ngo yari yanywereye muri Kigali Universe dore ko hari amashusho abyerekena. Akimara kugonga uwo mupolisi yamutwaye mu mapine nka metero 50.

Nyuma yahise ashyira imodoka kuri Onomo Hotel ubundi ahungira mu karere ka Karongi ariho yafatiwe.

Ku cyaha cyo gukoresha ibiyobyabwenge, Ubushinjacyaha bwavuze ko basanze iwe mu rugo udupfunyika tubiri tw'urumogi. 

Hari umupolisi watanze ubuhamya wari mu kazi ,yavuze ko DJ Toxxyk bashatse kumuyobora ariko arangije ntiyahagarara. 

Ku cyaha cyo gukoresha ibiyobyabwenge, DJ Toxxyk mu Bugenzacyaha yavuze ko acana ikibiriti agatwika urumogi ubundi agakoresha umwotsi bityo akajya mu kazi. Ni ibintu yatangiye gukoresha kuva mu 2021 ubwo yatandukanaga n'umugore we.

Ku cyaha cyo guhunga  wakoze cyangwa se wateje impanuka, Ubushinjacyaha bwavuze ko yemeye ko yatorotse kandi ko yafatiwe mu karere ka Karongi. 

Ubushinjacyaha bwavuze ko hari impamvu zikomeye zituma DJ Toxxyk asabirwa gufungwa iminsi 30 y'agateganyo.

Bwavuze ko atatoroka ubutabera, ibyo akurikiranyweho harimo ibyaba birengeje imyaka ibiri. Ikindi kandi Ubushinjacyaha bwavuze ko kuba yaratangiye gukoresha urumogi kuva mu 2021, nafungwa iminsi 30 y'agateganyo ntabwo azongera gukoresha urumogi kuko ntaho yarukura muri gereza. 

9:52 Abunganira DJ Toxxyk baburanye

Shema Arnaud alias DJ Toxxyk yahawe umwanya. Icyaha cy'ubwicanyi budaturutse ku bushake yacyemeye ariko yanyomoje Ubushinjacyaha avuga ko yari avuye mu kazi. Ikindi cyaha yemeye ni icyo guhunga umaze guteza cyangwa se gukora impanuka.

Umupolisi yaramuhagaritse, ariko yari yafashwe n'agatotsi, yakangutse asanga yuriye borudiro, noneho umupolisi yahunze imodoka yari yabuze rutangira. 

DJ Toxxyk akimara kubona ko yagonze agira ubwoba, hari inshuti ye yamubwiye ko nahagarara bababarasa. DJ Toxxyk yigiriye inama yo gusiga imodoka kuri Onomo Hotel ajya I Karongi gusaba ubufasha.

Yavuze ko bamusanze I Karongi baramupima basanga nta nzoga yanyoye.

Icyaha cyo kwanga gupimwa yavuze ko rwose abeshyerwa kuko yemeye ko bamupima. Icyaha cyo gukoresha ibiyobyabwenge yavuze ko bagiye kumusaka iwe mu rugo, basanze urumogi iwe mu rugo bafata ifoto.

Yavuze ko banditse ibintu atazi, abasabye kubisoma baramuhakanira bamubwira ko bwije. Hari nka saa moya z'ijoro.

 Yategetswe gusinya ibyo atazi. Ngayo nguko uko yisanze yasinye ibyo gukoresha ibiyobyabwenge kandi atabizi.Icyaha yemeye yagisabiye imbabazi.

Urukiko rwabajije DJ Toxxyk impamvu yagiye I Karongi 

DJ Toxxyk yabwiye Urukiko ko yagiye I Karongi gushaka inama ku nshuti ye ari nawe wamubwiye gutuza. Yavuze ko imodoka yayiparitse yamaze kumenya ko umupolisi yapfuye.

Urukiko rwamubajije ahavuye urumogi rwafatiwe iwe mu rugo, yasubije ko yamaze iminsi ine ahantu atazi. Nyuma abagenzacyaha bamubwiye ko bajya iwe kumusaka, akaba atazi ahavuye urumogi. 

Urukiko rwamwibukije ko imvugo zo muri RIB zemeza ko DJ Toxxyk yemeye ko akoresha urumogi. Ku ruhande rwa DJ Toxxyk yavuze ko atazi ahavuye urumogi kuko ibyo yababwiye byose nta kintu na kimwe banditse.

Urukiko rwibukije DJ Toxxyk ko yasinye inyandiko zose, bivuze ko yasinyiye ibyo yasomye. DJ Toxxyk yasobanuye ko ibyo yaganiriye n'Ubugenzacyaha atahawe amahirwe yo kubisoma kuko bari ku gitutu. Ati"Barambwiye ngo gira vuba usubire muri kasho".

DJ Toxxyk yabwiye Urukiko ko Ubugenzacyaha bwamuhimbiye ibyaha byo gukoresha ibiyobyabwenge kandi atazi aho rwavuye. 

DJ Toxxyk yasabye ko yaburana adafunze kuko nta kibazo yateza. Umwunganizi wa DJ Toxxyk yavuze ko habayeho ubuteganye buke , nta bushake yari afite mu gukora icyaha cyo kwica bidaturutse ku bushake.

 Maitre José yabwiye urukiko ko itegeko riteganya igihano cy'amezi atandatu (6) kugeza ku myaka ibiri (2) n'ihazabu ya 500,000 Frw kugeza kuri miliyoni ebyiri (2).

Yasabye ko hatangwa ihazabu noneho DJ Toxxyk agafungurwa.

Ku cyaha cyo gukoresha ibiyobyabwenge, Maitre José yavuze ko isakwa ryabaye hari inzego z'ibanze ariko nyiribwite atari ahari.

Yanyomoje imvugo y'ubushinjacyaha imusabira gufungwa avuga ko nta mpamvu zihari kuko basabye ko apimwa ibiyobyabwenge ariko ntibyakozwe, yapimwe inkari bareba niba yarakoresheje ibisindisha ariko ngo nta raporo z'ibyo bizami yagaragaye.

Ku cyaha cyo guhunga umaze guteza cyangwa se gukora impanuka, Maitre José yavuze ko kujya I Karongi kureba inshuti ye, yamusabye kumuherekeza cyangwa se kumuhamagarira polisi. Yafashwe mu ijoro yakoreyemo impanuka. 

Uwunganira DJ Toxxyk yavuze ko Ubushinjacyaha bubeshya ku ngingo yo kuvuga ko DJ Toxxyk yanze ko bamupima, nyamara ntabwo bagaragaza icyerekana ko yanze ko apimwa ibisindisha.

Yasoje avuga ko asanzwe yitwara neza, kandi ko afite pasiporo bibaye ngombwa Ubushinjacyaha bwayifatira.

Undi wunganira DJ Toxxyk yafashe umwanya avuga ko nyirubwite asaba imbabazi abanyarwanda, Urukiko n'urwego rwa Polisi nyakwigendera yakoreraga.

Ku mashusho yerekana ko DJ Toxxyk yari mu kabari, umunyamategeko yavuze ko mu Rukiko hakoreshwa ibimenyetso hakirindwa guhimba ibintu. Yavuze ko kuba mu kabari bidasobanura gusinda.

Ati"Ushobora kuba mu kabari utanyweye, n'ayo mafoto ya Kigali Universe ntayo twabonye".

Yavuze ko ibyo bitahabwa agaciro. Ku cyaha cyo Gutoroka wakoze cyangwa se wateje impanuka, Umunyamategeko yavuze ko akimara gukora impanuka akajya I Karongi, yavuze ko yataye ubwenge'Traumatised'.

Yavuze ko kuba wakora impanuka ukava aho yabereye ari irengayobora. Kandi koko kuri DJ Toxxyk yari yagize ubwoba kuko mu mutwe ntibyari ku murongo.

Umwunganizi wa DJ Toxxyk yavuze ko kwemeza ko uwo yunganira yari yasinze kuko nta bipimo bamufashe. Ku cyaha cyo gukoresha ibiyobyabwenge yabwiye urukiko ko Ubushinjacyaha butamupimye ngo haboneke raporo y'inzobere. 

Umunyamategeko yibukije ko ihame ari uko umuntu aburana adafunzwe. Yibukije u

Urukiko ko rushobora kugira icyo rutegeka uwo yunganira. Yavuze ko ibyaha byose akurikiranyweho bifite amahazabu. 

Yanenze inyandiko zo mu Bugenzacyaha kuko yabajijwe atunganiwe. Yagarutse kuri raporo y'abo mu nzego z'ibanze aho yavuze ko umuyobozi w'umudugudu atari mu mwanya mwiza wo kumenya urumogi kuko hakoreshwa ibizamini bya gihanga.

Umunyamategeko yasabye Urukiko ko DJ Toxxyk yategekwa ibyo yubahiriza birimo kutarenga akarere ,gufatirirwa ibyangombwa n'ibindi yasabwa byose yiteguye kubyubahiriza.

Urukiko rwabwiye abunganira DJ Toxxyk ko hari umukozi w'isuku n'umupolisi bose bafatwa nk'abatangabuhamya zitandukanye n'ibivugwa n'abunganira DJ Toxxyk.

Maitre Gad yibukije Urukiko imvugo z'abatangabuhamya nta muntu uzigenzura. Igikenewe ni ibimenyetso ku byabaye byose.

10:55 Ubushinjacyaha bwasobanuye ko DJ Toxxyk yemereye Ubugenzacyaha ko yatangiye kunywa ibiyobyabwenge kuva mu 2021 agitandukana n'umugore we. Bwavuze ko yafashwe hashize amasaha 12 kandi ko yanze ko bamupima inzoga. Impande zose zimaze kwisobanura, Urukiko rwapfundikiye urubanza, Icyemezo kizasomwa ku wa Gatatu tariki 21 Mutarama 2026 saa munani.

11:01 Abunganira DJ Toxxyk basinye ku nyandiko y'urubanza noneho abari baje kumva urwo rubanza barataha. Hahise hakurikiraho izindi manza 12 zari zateganyijwe kuburanishwa uwo munsi.