Amakuru yatangajwe na Kyiv kuri uyu wa Gatandatu, avuga ko iki gitero cyahitanye abantu icyenda, abandi bane barakomereka. Ibi byabaye nyuma y'amasaha make Moscow na Kyiv bagiranye ibiganiro by’amahoro imbonankubone bwa mbere mu myaka itatu ishize.

Polisi y'igihugu muri Ukraine, yatangaje ko ibi bisasu byarashwe atari ukurasana gusa ahubwo ari ibyaha by'intambara byakozwe.

Ibiro ntaramakuru by'u Burusiya, TASS, byo byatangaje ko Minisiteri y’Ingabo y’u Burusiya yavuze ko ingabo zayo zagabye igitero cya drone muri Sumy ahari ibikoresho bya gisirikare bya Ukraine.

Inama yahuje abayobozi b’u Burusiya n’aba Ukraine yabereye muri Turukiya ku wa Gatanu ntiyabashije kugera ku masezerano yo guhana agahenge mu ntambara. Ibi biganiro byari ibya mbere bibaye imbonankubone hagati y'ibihugu byombi kuva intambara ibihanganishije yatangira muri Gashyantare 2022.

Minisitiri w’Ububanyi n’Amahanga wa Ukraine, Andrii Sybiha, yavuze ko Amerika, u Burayi n'Isi muri rusange bakwiye gushyira igitutu kuri Putin, agahagarika kwica abasivili.