Kinyarwanda
English
Swahili
Uganda: Umugaba wungirije w'Ingabo zirwanira ku butaka yitabye Imana
Umugaba wungirije w'Ingabo zirwanira ku butaka mu Gihugu cya Uganda wari umaze amezi abiri mu bitaro, mu gitondo cyo kuri uyu wa Gatandatu yitabye Imana azize indwara ya stroke. Igisirikare cya Uganda UPDF, cyatangaje ko kibabajwe n'urupfu rw'uwo mugabo wari umaze imyaka irenga 35 muri icyo Gisirikare.
Igisirikare cya Uganda UPDF, cyatangaje inkuru y'akababaro y' urupfu rw' uwari Umugaba w' Ingabo zirwanira ku butaka wungirije mu Gihugu cya Uganda, witabye Imana mu gitondo cyo kuri uyu wa Gatandatu azize indwara stroke.
Major General Francis Takirwa wari umaze imyaka irenga 35 mu Gisirikare cya Uganda UPDF, yapfiriye mu bitaro bya Bikuru bya Gisirikare bya Mbuya, mu gihe yari yagejejwe muri ibyo bitaro kuwa Gatanu tariki ya 6 Gashyantare 2026, kugirango yitabweho by'umwihariko avanwe mu bitaro bya Nakasero, yari yagezemo tariki ya 9 Ukuboza 2025 nkuko tubikesha the New vision.
Mbere y'uko aremba, yari Umugaba wungirije w' Ingabo zirwanira ku butaka zifite icyicaro ahitwa Bombo. Igisirikare cya Uganda UPDF( Uganda People’s Defence Forces) cyatakaje umwe mu basirikare bafite ibigwi muri icyo Gisirikare, winjiye mu Gisirikare 1989 nyuma y'imyaka 3 Museveni afashe ubutegetsi.
Major general Francis Takirwa, wavutse tariki ya 7 Ugushyingo 1965, mu mirimo ikomeye yakoze, yabaye umuyobozi muri diviziyo ya Kabiri ikorera i Mbarara nyuma agirwa Umugaba wungirije w'Ingabo zirwanira ku butaka. Yahawe amahugurwa mu bya Gisirikare yakoreye mu bihugu bya Uganda, Tanzania, Ubushinwa, Afurika y 'Epfo na Misiri.
Uwo mugabo wapfuye afite imyaka 60, yanagize uruhare mu bikorwa byo kubungabunga Umutekano n'Amahoro muri Somalia, mu butumwa bw'Ingabo ziswe AMISOM, aho yagize uruhare mu guhangana n'imitwe y'iterabwoba.
Mu zindi nshingano yahawe harimo no kuyobora ishami ry Uburezi , Umuco na Siporo mu Gisirikare cya Uganda. Mu bindi bivugwa kuri Major General, Francis Takirwa, harimo kuba yaragize uruhare mu gushyigikira ubufatanye hagati y' Ingabo za Uganda UPDF n' Ingabo z' u Rwanda RDF mu rwego rwo guteza imbere ibikorwa by'umutekano ku mipaka y'Ibihugu bya Uganda n' Rwanda.
Urupfu rwa Major General Francis Takirwa rwabaye mu gihe Perezida Yoweli Kaguta Museveni yatangiraga urugendo rw'akazi mu Gihugu cya Tanzania. Ibinyamakuru byo muri Uganda n' ibyamamare mu gukoresha imbuga nkoranyambaga bagaragarutse ku rupfu rwe, mu gihe ishuri rya Mbarara High school ryatangaje ribabajwe n'urupfu rwa Major General Francis Takirwa ndetse ko abanya Uganda babuze umuntu wagiriye akamaro Uganda.
