Ku itariki 5 Ukwakira 2025, mbere y'umukino wahuje APR FC na Pyramids FC nibwo hasohotse amakuru yemeza ko Dauda Yusif na Mamadou Sy batari buze kugaragara kuri uyu mukino kubera imyitwarire itari myiza bagaragaje mbere y'uyu mukino.

Ikipe ya APR FC yaje gutsindwa ibitego 3-0. Nyuma y'uyu mukino nibwo hatangiye kuvugwa amakuru menshi agiye atandukanye y'imyitwarire y'aba bakinnyi ndetse ubuyobozi bwa APR FC buza gutangaza ko bategereje umutoza bakabona gufata umwanzuro.

Mu gitondo cyo kuri uyu wa Gatanu tariki 10 Ukwakira 2025, nibwo Ubuyobozi bwa APR FC bwashyize hanze itangazo rimenyesha abakunzi bayo ko abakinnyi babiri, Mamadou Sy ndetse na Dauda Yusif Seidu, bahagaritse iminsi 30 mu gihe hari gukorwa iperereza ryimbitse kuri iyi myitwarire.

Muri iri tangaza APR FC yagize iti " Ubuyobozi bwa APR FC bwifuje gusobanurira abo bireba, cyane cyane abafana n'abakunzi bacu b'akadasohoka, ibyerekeye ikibazo cy'imyitwarire idakwiye cyagaragaye i Cairo, mu Misiri, mu mukino wa CAF Champions League wahuje APR FC na Pyramids FC.

Mu gihe cyo kwitegura uwo mukino, abakinnyi babiri Sy Mamadou na Dauda Yussif basuzuguye nkana amabwiriza n'amategeko yari yatanzwe n'umutoza mukuru hamwe n'ubuyobozi bw'ikipe. Iyo myitwarire mibi bagaragaje yagize ingaruka mbi ku musaruro w'ikipe no gushyira hamwe bisanzwe bituranga."

APR FC yakomeje igira iti " Nyuma yo kubiganiraho imbere mu ikipe, hakanakurikizwa amategeko agenga imyitwarire y'ikipe ndetse n'amasezerano y'abakinnyi, Ubuyobozi bwafashe icyemezo cyo guhagarika abo bakinnyi bombi mu gihe cy'iminsi mirongo itatu (30). Icyo gihano kizatanga umwanya wo gukora iperereza ryigenga kandi ryimbitse mbere y'uko ubuyobozi bufata izindi ngamba."

APR FC yemeje ko izakomeza guhagarara no Gushyira imbere ubunyamwuga ndetse ko nta muntu uri hejuru y'ibiranga iyi kipe y'ingabo z'igihugu.

Iri tangazo risohotse nyuma y'iminsi Dauda Yusif Seidu arimo gukora imyitozo mu ikipe ya APR FC ariko Kandi Mamadou Sy akaba ari mu ikipe y'igihugu ya Mauritania.