Sengabo Jean Bosco uzwi ku izina rya Fatakumavuta, wakatiwe gufungwa imyaka ibiri n’amezi atandatu (6) akaba asigaje amezi ane ngo arangize igihano cye, yatangaje ko azava mu igororero yarahindutse mu buryo bugaragara, ku buryo n’abataramwishimiraga mbere bazatangira kumwumva no kumwishimira.

Mu kiganiro yagiranye n'Imvaho Nshya, yagize ati: “Naragorowe kandi naragororotse. Nzataha ntandukanye n’uwo bari bazi.” Yongeraho ko mu kugaruka kwe, abamuciraga urubanza nabi bazatungurwa, naho abafana be bakazanyurwa n’uko azaba yarahindutse.

Ku wa Gatanu tariki 13 Kamena 2025 urukiko rw'isumbuye rwa Nyarugenge rwasomye umwanzuro w’urubanza rwaburanishijwe tariki 15 Gicurasi 2025, rwarangiye Fatakumavuta ahakana ibyaha yaregwaga byose.

Urukiko rwatangaje ko rwasanze Fatakumavuta ahamwa n’icyaha cyo gukangisha gusebanya kimuhama ruvuga ko hashingiwe ku magambo yagiye avuga ari mu bikigize kikaba gihanishwa igifungo cy’umwaka umwe n’ihazabu ya 300 000 Frw.

Kubijyanye n’icyaha cyo gutangaza makuru y’ibihuha, rwasanze ibikorwa n’imvugo bya Fatakumavuta bijyanye n’itegeko rihana icyo cyaha gihanishwa igifungo cy’imyaka itatu n’ihazabu ya 1 000 000 Frw.

Urukiko rwasanze kuba mu mubiri wa Fatakumavuta harasanzwe igipimo kirenze igiteganyijwe, bimuhamya icyaha cyo gukoresha ibiyobyabwenge gihanishwa igifungo cy’umwaka umwe, ruvuga ko ibijyanye n’uko yakongera gupimwa nta shingiro bifite kuko atagaragaza impamvu cyangwa ikimenyetso kivuguruza raporo y’abahanga yatanzwe n’Ubushinjacyaha.

Urukiko rwasobanuye ko kubera impamvu nyoroshyacyaha, Fatakumavuta yakatiwe igihano cy’imyaka ibiri n’amezi atandatu n’ihazabu ya 1 300 000 Frw, rumumenyesha ko yemerewe kujuririra iki cyemezo mu minsi itarenga 30 kuva iki cyemezo gifashwe.

Fatakumavuta nubwo hasigaye amezi ane (4) ngo arangize igihano, Ukwelitimes yigeze kubona ubujurire bwe icyakora amaso yaheze mu kirere. Mu kiganiro ukwelitimes.com yigeze kugirana na Fatakumavuta yasobanuye ko Urukiko rwakiriye ubujurire bwe ariko ntiyahawe itariki yo kuburana. 

Inkiko zo mu Rwanda zikunze kugaragaza ubwinshi bw'imanza ziruta kure abacamanza, ariyo mpamvu zimwe mu manza zitinda kuburanishwa.

Mu gutangiza icyumweru cy'Ubutabera Perezida w'Urukiko rw'Ikirenga Donatilla Mukantaganzwa yavuze ko hari ababuranyi baburana umuhenerezo kugeza ku Rukiko rw'Ikirenga nyamara babura urwa ndanze.

Kuri Fatakumavuta rero wakatiwe ntanyurwe,Urukiko yajuririyeho rukomeje kumwima itariki yo kuburana yazafungurwa ataburanye urubanza rw'ubujurire.

Fatakumavuta yatawe muri yombi tariki ya 18 Ukwakira 2024, ubu akaba afungiwe mu Igororero rya Nyarugenge.

Mu Igororero rya Nyarugenge harimo imfungwa n’abagororwa 10 624 barimo abagore 1 299 harimo n’abafite abana 114.