Kwemera umwana (Reconnaissance d’un enfant) ni igikorwa cy’ubushake, cy’umuntu ku giti cye cyo kwemera ko yagira uburenganzira n’inshingano ku mwana yabyaye 

Kwemera umwana wavutse ku babyeyi batashyingiranywe

Ingingo ya 287 y’itegeko rigenga abantu n’umuryango ivuga ko nyina w’umwana wavutse ku babyeyi batashyingiranywe ari uwamubyaye kandi bikandikwa mu gitabo cy’inyandiko z’amavuko cyangwa wabyemejwe n’urukiko naho se ni uwamwemeye ku giti cye cyangwa wabyemejwe n’urukiko.

Igihe cyo kwemera umwana n’aho bikorerwa

Ingingo ya 288 isobanura ko kwemera umwana ari igikorwa cy’ubushake kandi gikorwa n’umuntu ku giti cye bikorerwa imbere y’umwanditsi w’irangamimerere, akabikorera inyandiko kandi ko nta gihe ntarengwa kigira.

Umwana ushobora kwemerwa

Mu ngingo ya 289 havugwa umwana ushobora kwemerwa ko ari umwana uriho, umwana batwite ariko akavuka ari muzima, cyangwa umwana wapfuye iyo yasize abamukomokaho.

Umwana wemewe n’uwamubyaye afite uburenganzira n’inshingano bimwe n’iby’abana bakomoka ku bashyingiranywe

Kwemerwa k’umwana nk’uvuka ku babyeyi bashyingiranywe

Ingingo ya 295 ivuga ko umwana wavutse ku babyeyi batashyingiranywe yemerwa nk’uwavutse ku bashyingiranywe iyo se na nyina bamwemeye mu gihe cyo gushyingirwa kwabo

Iya 296 kwemerwa k’umwana nk’uvuka ku babyeyi bashyingiranywe kwandikwa mu bitabo by’irangamimerere by’aho ishyingirwa ryabereye cyangwa by’aho umwana yavukiye. Uko kwemerwa k’umwana kwandikwa mu nyandiko y’ivuka.

Uburenganzira n’inshingano by’umwana wemewe nk’uvuka ku babyeyi bashyingiranywe

Umwana wemewe nk’uvuka ku babyeyi bashyingiranywe agira uburenganzira n’inshingano bimwe nk’iby’umwana wavutse ku bashyingiranywe. Ingingo ya 298.