Amasezerano yashyizweho umukono na Minisitiri w’Imari n’Igenamigambi w’u Rwanda, Yusuf Murangwa, na Ambasaderi w’u Budage mu Rwanda, Heike Uta Dettmann. Aya mafaranga azacishwa mu Kigo cy’Igihugu gishinzwe guteza imbere ibikorwa by’iterambere mu nzego z’ibanze (LODA), kigira uruhare runini mu bikorwa byo kurandura ubukene mu gihugu.

Minisitiri Murangwa yashimangiye ko iyo nkunga izafasha igihugu gushyira mu bikorwa gahunda ziteza imbere abaturage batishoboye, zirimo gutanga inkunga ku bantu bageze mu zabukuru, abafite ubumuga ndetse n’ingo zugarijwe n’ubukene bukabije. Yanongeyeho ko amafaranga azanifashishwa mu bikorwa byo guha abaturage akazi binyuze mu mishinga yo kubaka ibikorwa remezo n’indi myuga ituma bagira ubushobozi bwo kwibeshaho.

Ati “Iyi nkunga y’u Budage binyuze muri Banki y’Iterambere y’u Budage (KfW) ni igihamya cy’ubufatanye dufitanye mu guteza imbere imibereho y’abaturage. Iziye igihe kuko izongera imbaraga mu rugamba rwo kurandura ubukene mu buryo burambye”.

Ambasaderi Heike Uta Dettmann yavuze ko u Budage bushimishwa n’intambwe u Rwanda rumaze gutera mu kugabanya ubukene no guteza imbere imibereho y’abaturage. Yagaragaje ko iyo nkunga ari igice cy’ubufatanye burambye hagati y’ibihugu byombi mu gushyigikira iterambere rirambye n’icyerekezo cy’u Rwanda.

Ati “U Rwanda ruratanga urugero rwiza mu guharanira iterambere ridaheza. Twishimiye kuba abafatanyabikorwa muri uru rugendo”.

U Rwanda rumaze kugabanya igipimo cy’ubukene kiva kuri 39.8% mu 2017 kigera kuri 27.4% mu 2024. Ibi byagezweho binyuze mu mishinga nka VUP, Girinka, n’indi ituma abaturage bagira uruhare rufatika mu iterambere.

Iyi nkunga y’u Budage ije kongerera imbaraga gahunda zafashije gukura Abanyarwanda barenga miliyoni 1.5 mu bukene mu gihe cy’imyaka irindwi ishize, ikaba ari indi ntambwe ikomeye mu rugendo rwo kugera ku iterambere rirambye n’imibereho myiza kuri bose.