Mu ijoro ryo kuwa kabiri tariki 1 Nyakanga 2025, ikipe ya Real Madrid saa tatu z'ijoro yakinnye na Juventus FC mu mukino wa 1/8 mu gikombe cy'isi cy'ama-Club.

Ni umukino utari woroshye ariko utaryoshye cyane kuko ikipe zombi zafunze cyane ibitego birabura ariko ikipe ya Real Madrid iza kubona igitego kimwe ku munota wa 54 gitsinzwe na Gonzalo Garcia wazamuwe avanwe mu bato ba Real Madrid, aba ari nacyo gisoza umukino.

Iki gitego cyaje gikurikiye ibyo bari bahushije byinshi abarimo Vinicius Jr, Fede Valverd ndetse na Arda Guler.

Ku isaha ya saa cyenda mu rucyerera rwo kuri uyu wa Gatatu, ikipe ya Borussia Dortmund yagombaga gukina na Monterrey ikinamo Sergio Ramos wakinnye muri Real Madrid.

Uyu mukino nawo ntabwo woroheye Borussia Dortmund kuko yaje gukomeza muri 1/4 ku ntsinzi y'ibitego 2-1. Ibi bitego byose bya Borussia Dortmund byatsinzwe na Serhou Guirassy ku munota wa 14 na 24. Igitego kimwe rukumbi cya Monterrey, cyatsinzwe na German Berterame ku munota wa 48.

Izi kipe zakomeje mu ijoro ryacyeye, Real Madrid na Borussia Dortmund, ni nazo zizahura muri 1/4 cy'igikombe cy'isi cy'ama-Club. Uyu mukino uzaba tariki 5 Nyakanga 2025, saa ine z'ijoro.

Real Madrid yasezeye Juventus FC 

Borussia Dortmund yasezereye Monterrey